Orðspor Íslands sem áfangastaðar hefur ekki beðið hnekki vegna verkfalls Eflingar, segir aðstoðarframkvæmdastjóri Berjaya hótela, en orðspor hótelanna sem var lokað gerði það. Starfsemin sé komin af stað á ný, en tjón sé óljóst.
Að minnsta kosti fjórir létust þegar Rússar vörpuðu sprengju á íbúðablokk í Zaporizhzhia í morgun. Leiðtogar G-tuttugu ríkjanna þrýsta á kínverja að senda ekki vopn til Rússlands.
Tæpa sjö milljarða króna kostar að stækka framhaldsskóla svo unnt sé að efla starfsnám. Mennta- og barnamálaráðherra segir að ráðist verði í byggingaframkvæmdirnar á næstu fimm til átta árum.
Grískir lestarstarfsmenn hófu dagsverkfall í morgun vegna viðbragða stjórnvalda við lestarslysinu þar í gær. Grískur stöðvarstjóri gæti átt yfir höfði sér lífstíðarfangelsi vegna slyssins, en þar létu 43 lífið.
Engin merki eru um að kvika sé að færast nær yfirborði við Öskju. Hiti í Öskjuvatni mældist 28 stig þar sem mest var fyrir tíu dögum. Þar er þekkt jarðhitasvæði.
Skýrar reglur verða settar um það hvenær á að telja atkvæði aftur, samkvæmt frumvarpi um breytingar á kosningalögum. Þetta er í fjórða sinn sem þessum nýju lögum er breytt til að bregðast við ágöllum.
