Stoðdeild Ríkislögreglustjóra flutti fimmtán umsækjendur um alþjóðlega vernd úr landi til Grikklands í nótt. Í hópnum var fólk sem ekki hafði fengið endanlega niðurstöðu sinna mála. Alls átti að flytja tuttugu og átta til Grikklands en þrettán fundust ekki þegar þeirra var leitað.
Starfsmenn Isavia beindu flóðljósum að myndavél RÚV, að því er virðist til að spilla störfum tökumanns á Keflavíkurflugvelli í nótt. Talsmaður Isavia segir að þar hafi fyrirmælum lögreglu verið fylgt. Lektor í blaða- og fréttamennsku segir þetta grófa aðför að lýðræði og aðhaldshlutverki fjölmiðla.
Breski seðlabankinn tilkynnti í dag um mestu stýrivaxtahækkun frá árinu 1992. Vextirnir hafa þrjátíufaldast á innan við ári.
Meðaltekjur öryrkja sem leita til umboðsmanns skuldara eru tæplega 14 þúsund krónum minni á mánuði en í fyrra. Formaður Öryrkjabandalagsins segir stöðuna fara versnandi.
Allir rafkaplar Zaphorizhzia kjarnorkuversins í Úkraínu eru rofnir eftir sprengingar Rússlandshers. Úkraínumenn óttast að Rússar ætli að flytja orkuna til Krímskaga.
Náttúrustofa Austurlands leggur til að veiðikvóti hreindýra verði skertur þriðja árið í röð vegna fækkunar dýranna. Kvótinn hefur ekki verið minni í sautján ár.
Knattspyrnusamband Evrópu kynnti í morgun miklar breytingar á undankeppnum stórmóta í fótbolta kvenna. Tekin verður upp deildaskipting og við bætist Þjóðadeild, líkt og í karlaflokki.
