Minnst tíu eru látnir eftir að Rússar gerðu eldflaugaárás á fjölda borga í Úkraínu í morgun, þar á meðal höfuðborgina, Kyiv. Forseti Rússlands segir árásina svar Rússa við því að mikilvæg brú við Krímskaga var sprengd um helgina. Leiðtogar vestrænna ríkja hafa fordæmt þessa árás og ítrekað stuðning við Úkraínu
Tveir karlar á fimmtudagsaldri eru í gæsluvarðhaldi í tengslum við lát konu á sextugsaldri. Konan fannst látin í bíl í Túnunum í Reykjavík á laugardagsmorgun.
Átök innan verkalýðshreyfingarinnar voru ofarlega í huga þingfulltrúa á ASÍ þinginu sem sett var í morgun, en einnig komandi kjarasamningar og verkefni næstu vikna.
Veðurviðvaranir vegna norðanstorms og úrkomu, sem gekk yfir landið í gær og í nótt, eru fallnar úr gildi. Björgunarsveitir fóru í yfir 30 verkefni vegna óveðursins. Þrír biðu af sér veðrið í fjöldahjálparstöð í Vík í Mýrdal í nótt.
Hæstiréttur hefur vísað máli gegn fyrrverandi bankastjóra MP banka frá dómi vegna mistaka Endurupptökudóms. Fyrir vikið stendur sýknudómur úr héraðsdómi þrátt fyrir að hann hafi áður verið sakfelldur í Hæstarétti.
Íslenskir tónlistarmenn eru hvattir til að fara í verkfall í tengslum við tónlistarhátíðina Iceland Airwaves til að mótmæla þátttöku Icelandair í að flytja hælisleitendur úr landi. Iceland Airwaves segist ekki skilja hvaða hagsmunum það þjóni að knésetja mikilvægustu hátíð íslenskrar tónlistar.
