Mennirnir tveir sem eru grunaðir um að leggja á ráðin um hryðjuverk, eru sagðir hafa rætt um að fremja fjöldamorð á árshátíð lögreglumanna í næstu viku. Annar þeirra var látinn laus úr gæsluvarðhaldi deginum áður en hann var handtekinn að nýju.
Dómsmálaráðherra segir ljóst að frekari fjárheimildir séu þarfar til löggæslu í landinu. Hann segir að burt séð frá atburðum síðustu daga sé þörf á að endurskoða fyrirhugaðan niðurskurð til lögreglunnar.
Atkvæðagreiðslur standa yfir í fjórum hernumdum héruðum í Úkraínu um að sameinast Rússlandi. Niðurstaðan þykir fyrirfram gefin og ef Rússar innlima héruðin gætu átökin stigmagnast.
Fyrsta haustlægðin er væntanleg um helgina. Gul viðvörun tekur gildi um nánast allt land síðdegis á morgun eða annað kvöld, og búist er við snjókomu á fjallvegum norðaustan til.
Með þingsályktunartillögu sem lögð hefur verið fram á Alþingi er lagt til að efla verulega félagslega hluta fiskveiðistjórnunarkerfisins. Það fæli í sér miklar tilfærslur á veiðiheimildum til strandveiða.
Framkvæmdastjóri Landverndar segir að vindorkufyrirtæki á Vesturlandi hafi farið með rangfærslur um stefnu stjórnvalda í orkumálum á kynningarfundum í vikunni. Talsmaður eins vindorkufyrirtækjanna sakar Landvernd um áróður á fundunum.
Nemendur Kvennaskólans í Reykjavík hafa farið um borgina með pilsaþyt og dansi í morgun. Árlegur peysufatadagur skólans er í dag.
