Verkefnastjóri Neyðarmóttöku Landspítalans segir að aukin harka sé að færast í líkamsárásir meðal ungs fólks og að þörfin á fræðslu og forvörnum hafi sjaldan verið meiri. Málin séu sum algjör hryllingur.
Umboðsmaður Alþingis telur þörf á heildstæðri úttekt á aðgerðum stjórnvalda í heimsfaraldrinum svo draga megi lærdóm af þeim. Ýmis álitaefni séu uppi um hvort reglum réttarríkisins hafi verið fylgt.
Ekki er búið að taka ákvörðun um hvort örvunarbólusetning gegn COVID-19 verði í boði ár hvert hér á landi, eins og boðað er í Bandaríkjunum. Ný uppfærð bóluefni gegn covid eru komin til landsins.
Forseti Rússlands sakar Evrópulönd um að svindla á sér í kornútflutningi frá Úkraínu þar sem mest af korninu endi í Evrópulöndum en ekki fátækum ríkjum. Viðskiptaþvinganir vesturveldanna séu ógn við heimsbyggðina.
Ný lota kjarasamningsviðræðna er hafin. Samtök atvinnulífsins ræddu í gær við Starfsgreinasambandið um nýjan samning og hafa einnig rætt við fulltrúa VR.
Snjóskaflinn í Gunnlaugsskarði í Esjunni, sem hefur verið óformlegur mælikvarði á tíðarfar á Suðvesturlandi síðan á 19. öld, hverfur að öllum líkindum ekki í ár.
Íslenskir pönkarar eru ekki dauðir úr öllum æðum. Í hádeginu er sérstök pönkganga í vöggu íslenskrar pönkmenningar, Kópavoginum og við verðum þar í beinni útsendingu.
Íslenska kvennalandsliðinu í knattspyrnu tókst ekki að tryggja sér farseðil á heimsmeistaramótið sem fram fer á næsta ári. Næst á dagskrá er umspilsleikur þann 11. október.
