Rannsókn skotárásarinnar á Blönduósi um síðustu helgi gengur vel en ekki er hægt að upplýsa um röð atburða eða hvernig árásarmaðurinn lést fyrr en niðurstaða er komin úr vettvangsrannsóknum og réttarkrufningu. Þetta segir lögreglustjórinn á Norðurlandi eystra.
Forstöðumaður kjarasviðs fagfélaganna segir að eigendur veitingastaðanna Flame og Bambus skuldi þremur starfsmönnum sínum allt að þrisvar sinnum meira en þeir hafi fengið greitt í laun.
Jarðgasi, að verðmæti um einn komma fjórir milljarðar íslenskra króna, hefur verið brennt út í andrúmsloftið frá orkuveri í Rússlandi undanfarna daga. Sérfræðingar óttast umhverfisáhrifin og segja umfang gasbrennslunnar án fordæma.
Forsætisráðherra segir Seðlabankann standa frammi fyrir snúnu verkefni að hemja verðbólguna. Miklu skipti hvernig tekst til með kjarasamninga í haust.
Dýrbítur hefur lagst á lömb í Kelduhverfi og hafa fjögur dauð lömb fundist þar í sumar. Bóndi í sveitinni segir að tófur sjáist í byggð á hverjum degi.
Þrettán hundruð manns fóru um gosstöðvarnar í Meradölum í gær sem er meira en þrjú þúsund færri en fóru þar á meðan enn gaus. Fjörutíu og fimm sóttu um störf sex landvarða á svæðinu.
Tap af rekstri Strætó hefur aldrei verið jafn mikið og í ár. Framkvæmdastjóri Strætó segir að þjónusta verði ekki skert frekar.
Fyrsta lag söngkonunnar Britney Spears eftir sex ára hlé kom út í dag. Hún syngur þar dúett með poppgoðinu Elton John.
