Um hundrað foreldrar mótmæltu því í Ráðhúsi Reykjavíkur í morgun að hafa ekki fengið leikskólapláss fyrir börn sín í haust. Leikskólavandinn í borginni sé óboðlegur og þau krefjast tafalausra aðgerða.
Pólska ríkisútvarpið greindi frá því í morgun að sprengjugnýr hefði heyrst frá flugvelli í Hvíta-Rússlandi, þar sem geymdar eru rússneskar herflugvélar. Yfirvöld í Hvíta-Rússlandi neita því að sprengingar hafi orðið á flugvellinum.
Yfirlæknir á Barnaspítala Hringsins segir of algengt að eiturefni séu geymd á óöruggum stað á heimilum. Börn sem innbyrði uppþvottaefni geti hlotið varanlegan skaða af.
Drífa Snædal, fráfarandi forseti ASÍ, segir formann VR, formann Starfsgreinasambandsins og formann Eflingar hafa myndað blokk innan ASÍ sem ætli sér að ráða í krafti aflsmuna.
Almannavarnir búast við því að leiðigarðar verði reistir í Meradölum til að reyna að koma í veg fyrir að hraun fari að renna yfir Suðurstrandarveg og aðra mikilvæga innviði. Tímaspursmál er hvenær hraunið rennur úr Meradölum.
Foreldrar barna á Vatnsnesi hafa sent erindi til umboðsmanns barna vegna ástandsins á Vatnsnesvegi. Tæplega 30 börn þurfa að fara um ónýtan veginn á hverjum degi og foreldrar þeirra íhuga að halda þeim heima.
Edda Andrésdóttir les sinn síðasta fréttatíma á stöð tvö í kvöld eftir fimmtíu ára feril í fjölmiðlum.
Meistaramót Evrópu og Evrópumótið í sundi hófust í dag. Ísland á keppendur á báðum mótum en í dag keppir íslenska kvennalandsliðið í áhaldafimleikum.
