Næsti vetur mun ráða úrslitum um hvort íslensk stjórnvöld ná markmiðum sínum í loftslagsmálum. Þetta segir framkvæmdastjóri Samtaka iðnaðarins og stjórnarformaður Grænvangs. Hann segir að bretta þurfi upp ermar og kallar eftir markvissari stefnumörkun.
Úkraínuher hefur tekist að eyðileggja þrjár brýr á yfirráðasvæði Rússa í suðurhluta landsins og loka þannig fyrir birgðaflutninga innrásarliðsins. Héraðið Kherson [Her'son] er svo gott sem einangrað.
Það er alltaf hægt að klæða af sér íslenska sumarið, segir Einar Sveinbjörnsson veðurfræðingur. Hann líkir verslunarmannahelgarveðrinu fyrir norðan og á hálendinu við göngur að hausti, því snjóað getur í fjöll. Sólríkara gæti orðið sunnan heiða.
Jökulsá á Sólheimasandi var komin ansi nærri gólfinu á bráðabirgðabrúnni þegar mest lét í vatnavöxtunum í gær. Brúin hélt en djúp rás var grafin í árfarveginn til að bjarga henni.
Mestu máli skiptir að engin slys hafi orðið á fólki þegar bryggjan við Reykhólahöfn hrundi í fyrrinótt, segir framkvæmdastjóri þörungaverksmiðju sem stendur við höfnina. Ekki hefur komið til tals að tilkynna málið sérstaklega.
Bandarísk stjórnvöld hafa gert Rússum tilboð um framsal tveggja Bandaríkjamanna sem þeir hafa í haldi. Annar þeirra er körfuboltakonan Brittney Griner sem var handtekin í febrúar.
Brotthvarf úr framhaldsskóla hefur ekki mælst minna frá árinu 1995. Framhaldsskólanemendur af erlendum uppruna eru þó mun líklegri til þess að hætta í námi en þeir sem hafa íslenskan bakgrunn.
Búast má við því að sjávardýr sem eru algengari á heitari svæðum fari að sjást við strendur landsins. Hvalir og rostungar gætu farið að sjást í auknum mæli og jafnvel ákveðin skjaldbökutegund.
Heyskapur gengur víðast hvar ágætlega, vel heyaðist í júní en erfitt hefur verið að treysta á þurka í júlí. Sunnlenskir bændur hafa áhyggjur af kornuppskeru.
