Verðbólgan er komin í rétt tæp tíu prósent og hefur ekki verið meiri í nær þrettán ár. Forseti ASÍ óttast að fara inní haustið með svo háar tölur og nú verði stjórnvöld að beita sér til að milda höggið á þá sem standi veikt.
Rússar og Úkraínumenn hafa komist að samkomulagi um útflutning á korni frá úkraínskum höfnum. Það verður undirritað í Istanbúl eftir hádegi.
Óvissustigi hefur verið lýst yfir á Sjúkrahúsinu á Akureyri vegna mikils mönnunarvanda á gjörgæslu. Biðlað er til hjúkrunarfræðinga utan spítalans að koma til vinnu.
Formaður skipulags- og mannvirkjanefndar í Hveragerði segir að Hamarshöllin sem eyðilagðist í vetur hafi verið tifandi tímasprengja. Skýrsla sýnir að húsið var veikbyggðara en talið var.
Lögregla varð að skakka leikinn þegar uppúr sauð milli leikmanna Breiðabliks og svartfellska liðsins Buducnost Podgorica í gærkvöldi. Stuðningsmaður Breiðabliks segist aldrei hafa séð aðra eins hegðun á knattspyrnuvelli.
Strandveiðisjómaður á Raufarhöfn segir að með núverandi fyrirkomulagi strandveiða sé verið að taka aflaheimildir frá Norður- og Austurlandi og flytja þær á Vestfirði.
Menntamálaráðherra hyggst grípa til bráðaaðgerða vegna þungrar stöðu í iðnnámi. Mörg hundruð umsækjendum er vísað frá árlega.
Bæjarhátíðir verða haldnar víða um land um helgina og þar verða matur og tónlist í fyrirrúmi.
HM í frjálsum íþróttum hélt áfram í nótt. Shericka Jackson hljóp á næst besta tíma sögunnar í 200 metra hlaupi þegar hún sótti gull og setti meistaramótsmet.
