Sala Símans á Mílu til franska fjárfestingarsjóðsins Ardian virðist í uppnámi, tímabundið að minnsta kosti, því Ardian telur skilyrði í viðræðum við Samkeppniseftirlitið ekki samræmast kaupsamningnum. Forstjóri Símans segir að reynt verði að láta kaupsamninginn standa.
Breska veðurstofan ráðleggur fólki að halda sig heima í dag og á morgun vegna mestu hitabylgju sem farið hefur yfir Bretlandseyjar til þessa. Tugum skóla hefur verið lokað vegna hitans og gert er ráð fyrir samgöngutruflunum.
Landsbankinn spáir níu komma tveggja prósenta verðbólgu í júlí. Hratt vaxandi verðbólga bitnar mest á þeim sem minnst hafa og rýrir almennt kjör almennings segir forseti ASÍ. Hún kallar eftir aðgerðum stjórnvalda.
Persónuvernd og íslensk sveitarfélög taka þátt í samevrópskri úttekt á notkun Google-lausna í skólastarfi. Sviðstjóri hjá Persónuvernd segir að börn eigi að geta lært á stafræn tæki án þess að persónuupplýsingar þeirra lendi í röngum höndum.
Ofbeldi og hatur í garð hinsegin fólks er að aukast á Íslandi, segir framkvæmdastjóri Samtakana 78. Hann kallar eftir auknum fjárstuðningi til að vinna gegn þessari þróun.
Skemmdarverk hafa ítrekað verið unnin á stúdentagörðum Félagsstofnunar stúdenta við Skerjagarða við Suðurgötu í Reykjavík undanfarna daga. Þjónustustjóri segir að unnið sé að uppsetningu myndavéla í von um að góma þann seka.
Kvennalandslið Íslands í fótbolta mætir Frökkum í lokaleik sínum í riðlakeppni Evrópumótsins. Sigur í leiknum tryggir sæti í 16 liða úrslitum.
