Verðbólga verður sjö og hálft prósent að meðaltali á árinu, samkvæmt þjóðhagsspá Hagstofunnar, og hagvöxtur rétt rúm fimm prósent. Einkaneysla er meiri og erlendir ferðamenn fleiri en Hagstofan spáði í mars. Þá eiga áhrif stríðsins eftir að vara lengur en áður var talið.
Leiðtogar G-7 ríkjanna lýstu í morgun yfir áhyggjum af áformum Rússa, um að flytja eldflaugar sem geta borið kjarnaodda til Hvíta Rússlands. Landsstjórinn í Luhansk hvetur Úkraínumenn til koma sér á brott úr borginni.
Borgarfulltrúi Flokks fólksins segir að miklir fjármunir hafi verið lagðir í skipulagningu tæplega sjö hundruð íbúða byggðar í Skerjafirði, sem innviðaráðherra hefur sett á ís. Hún efast um að þeir fjármunir nýtist. Meirihlutinn hafi virt að vettugi athugasemdir minnihlutans síðastliðin tvö ár.
Leiðtogar Svía og Finna hitta Erdogan Tyrklandsforseta á fundi á morgun. Aðildarumsóknir ríkjanna eru teknar fyrir á leiðtogafundi NATÓ í vikunni. Tyrkir hafa einir verið andvígir aðild þeirra.
Óvenjuleg kuldatíð hefur ríkt frá því fyrir helgi. Ekki hefur verið kaldara á Akureyri svo seint í júní í 30 ár.
Búast má við að lokað verði fyrir rafmagn á næstu dögum hjá þeim sem hafa flutt nýlega og ekki valið raforkusala.
KR marði sigur á liði Njarðvíkur í bikarkeppni karla í fótbolta í gærkvöldi. Sextán liða úrslit keppninnar halda áfram í kvöld.
