Samfylking, Viðreisn og Flokkur fólksins hafa lagt fram breytingartillögur í sex liðum við frumvarp dómsmálaráðherra um útlendinga sem virðist vera stóra stíflan í umræðu um afgreiðslu mála frá Alþingi. Ljóst er að þingfrestun verður ekki í lok vikunnar eins og til stóð. Þingflokksformenn funduðu alla helgina.
Oddvitar minnihlutaflokkanna í borgarstjórn Reykjavíkur segja mikið um endurtekið efni og lítið um breytingar í samstarfssáttmála meirihlutans. Þeir segjast þó mæta fullir tilhlökkunar á fyrsta borgarstjórnarfundinn í dag.
Artis Pabriks, varnarmálaráðherra Lettlands segir að Evrópuríki verði skilyrðislaust að styðja Úkraínu til sigurs - nauðsynlegt sé að Rússar upplifi tap eftir innrás þeirra í Úkraínu. Pabriks er staddur hér á landi ásamt varnarmálaráðherrum tíu annarra ríkja, þar á meðal Þýskalands og Bretlands.
Eitt atkvæði vantaði upp á að sænska þingið samþykkti vantrauststillögu á dómsmálaráðherra landsins skömmu fyrir hádegi. 174 studdu tillöguna en 175 sögðu nei, sátu hjá eða voru fjarverandi.
Boris Johnson, forsætisráðherra Bretlands, er í erfiðri stöðu eftir að fjórir af hverjum tíu þingmönnum Íhaldsflokksins lýstu vantrausti á hann í gærkvöldi.
Bændur á Refsmýri ráku upp stór augu í gær þegar þau sáu að búið var að rista á hol tveggja vikna gamalt lamb á túni við bæinn. Bóndinn segist sannfærður um að þarna hafi menn verið að verki og hefur kært málið til lögreglu.
Jón Dagur Þorsteinsson, landsliðsmaður í fótbolta, segir leikmenn Íslands svekkta að hafa ekki náð að leggja Albaníu að velli í Þjóðadeildinni í gærkvöld. Jón Dagur skoraði mark Íslands í 1-1 jafntefli.
