Tveir snarpir jarðskjálftar urðu skammt undan Norðurlandi í nótt og í morgun - sá stærsti fjórir komma einn að stærð. Skólastjórinn á Dalvík segir að högg hafi komið á skólabygginguna við skjálftann og nemendum hafi ekki litist á blikuna.
Verðbólga mælist 7,6 prósent og hefur hún ekki verið meiri í tólf ár. Sem fyrr á hækkun húsnæðisverðs þar mestan þátt.
Leiðtogaráð Evrópusambandsins reynir í dag að ná samkomulagi um að hætta að flytja inn olíu frá Rússlandi. Ungverjar segja að það hefði alvarlegar afleiðingar fyrir efnahag þeirra að hætta að kaupa olíu af Rússum.
Dómsmálaráðuneytið hefur boðað enn frekari breytingar á nýju kosningalögunum sem tóku gildi um áramótin. Alvarlegir ágallar komu í ljós í nýafstöðnum sveitarstjórnarkosningum sem brýnt þykir að bregðast við
Nýir meirihlutar hafa verið myndaðir í Grindavík og Fjallabyggð. Í Grindavík verður Miðflokkurinn í minnihluta þrátt fyrir kosningasigur.
Leitarmenn hafa fundið 21 lík eftir að lítil farþegaflugvél brotlenti í Nepal í gær. 22 voru um borð
Sigurvegarar Eurovision söngvakeppninnar hafa selt verðlaunagripinn sem þeir fengu. Ágóðann á að nota til að verjast innrás Rússa.
Fram tryggði sér í gærkvöld Íslandsmeistaratitil kvenna í handbolta. Dregið er í næstu umferðir bikarkeppni karla og kvenna í fótboltanum nú í hádeginu.
