Vladimir Pútín Rússlandsforseti fullyrti enn og aftur í ræðu á Rauða Torginu í Moskvu í morgun að innrásin í Úkraínu hefði verið nauðsynleg til að tryggja öryggi Rússlands. Búist var við stórum yfirlýsingum frá Pútín í tilefni dagsins.
Rússar minnast þess í dag að 77 ár eru liðin frá sigri yfir nasistum í seinni heimsstyrjöldinni. Það hefur víða orðið tilefni mótmæla, meðal annars fyrir utan sendiráð Rússa í Reykjavík.
Nokkrir einstaklingar hér á landi hafa greinst með nýtt afbrigði kórónuveirunnar, sem talið er að dreifist hratt á milli manna. Sóttvarnalæknir segir ekki ástæðu til að grípa til samkomutakmarkana líkt og staðan er nú.
Starfsfólk Ölgerðarinnar fær hlutabréf í fyrirtækinu að gjöf, en fyrirtækið verður skráð í Kauphöllina í næsta mánuði.
Auglýsingaskilti og framboðsborðar hafa verið fjarlægð af bæjaryfirvöldum í Kópavogi víðs vegar um bæinn síðustu daga.
Þrátt fyrir að enn vanti tugi milljóna til að fjármagna nýja kirkju í Grímsey eru heimamenn byrjaðir að byggja.
Útgöngubanni hefur verið lýst yfir á Sri Lanka eftir að stuðningsmönnum og andstæðingum stjórnvalda laust saman í höfuðborginni Colombo. Flytja þurfti tugi mótmælenda á sjúkrahús.
Valur tryggði sig í gærkvöld áfram í úrslitaeinvígið um Íslandsmeistaratitil karla í handbolta.
