Fimmtíu og fimm manns taka þátt í aðgerðum til að ná upp flaki flugvélar sem fórst í Þingvallavatni í febrúar. Aðstæður eru góðar og aðgerðastjóri reiknar með að vélin verði komin á land fyrir kvöldmat.
Strokufangi sem leitað var að var handtekinn í nótt ásamt fimm öðrum. Lögreglan rannsakar hvort honum hafi verið veitt aðstoð við flóttann.
Yfir þrjátíu Palestínumenn særðust í bardaga við ísraelska lögreglumenn við Al-Aqsa moskuna í Jerúsalem í dag. Sameinuðu þjóðirnar lýsa yfir áhyggjum af síversnandi samskiptum Ísraela og Palestínumanna.
Tæplega sjötíu manns með tengsl við Úkraínu hafa óskað eftir vernd á Íslandi síðustu sjö daga. Gert er ráð fyrir að um tvö hundruð til viðbótar leiti hingað næstu vikur.
Enn er óvíst hversu útbreidd fuglaflensan er, sem greindist hér á landi fyrir nokkru. Matvælastofnun hefur fengið fjölmargar ábendingar um dauða eða veika fugla.
Mikil örtröð er á dekkjaverkstæðum þessa dagana. Við lítum inn hjá einu slíku í fréttatímanum.
Íslenska kvennalandsliðið í handbolta mætir Serbíu í undankeppni EM á morgun, og getur með sigri tryggt sér sæti á sínu fyrsta stórmóti í tíu ár.
