Formaður Eflingar óttast ekki að erfitt verði að manna skrifstofu stéttarfélagsins eftir hópuppsagnir í gær. Starfsmennirnir fengu uppsagnarbréf í tölvupósti í nótt.
Bandaríkjamenn segjast hafa sannanir fyrir að Rússar hafi framið mannréttindabrot í innrásinni í Úkraínu.
Forsætisráðherrar Finnlands og Svíþjóðar sitja á fundi í Stokkhólmi þar sem varnar- og öryggismál og innrás Rússa í Úkraínu verða rædd. Stjórnvöld beggja ríkja íhuga að sækja um aðild að Atlantshafsbandalaginu.
Aðgerðarstjóri vegna komu flóttafólks frá Úkraínu segir að búast megi við holskeflu í komu flóttafólks hingað til lands eftir páska.
Framsóknarflokkur og Píratar í Reykjavík auka verulega við fylgi sitt samkvæmt nýjum Þjóðarpúlsi Gallup. Meirihlutinn í borginni héldi velli með naumasta mun.
Hátt í sextíu hafa fundist látnir og margra er saknað af völdum mannskaðaveðurs í Suður-Afríku. Héraðið KwaZulu-Natal hefur verið lýst hamfarasvæði vegna flóða og skriðufalla.
Ísland og Austurríki mætast í dag í fyrri umspilsleik liðanna um sæti á HM í handbolta sem fram fer í Svíþjóð og Póllandi á næsta ári.
