Yfirkjörstjórn í Reykjavík norður var sú fyrsta á landinu til að ljúka talningu atkvæða í forsetakosningunum 2016. Guðni Th. Jóhannesson hlaut 36,0 prósent atkvæða í kjördæminu, (12.055 talsins). Andri Snær Magnason varð annar í kjördæminu með 23,8 prósent (7.964) og Halla Tómasdóttir þriðja með 22,0 prósent (7.363).

Sturla Jónsson sér um Snapchat-reikning RÚV í dag. Þar er hægt að fylgjast með því hvað hann tekur sér fyrir hendur, en allir forsetaframbjóðendur hafa fengið RÚV-snappið í einn dag síðustu daga.

Sturla Jónsson forsetaframbjóðandi segir að þegar stjórnarskrá Íslands er borin saman við stjórnarskrár Bandaríkjamanna og Frakka komi í ljós að stjórnskipunin hér sé sú sama og í þessum löndum.

„Ég vona það, kjósendur góðir, að þið ætlið ekki að fara að kjósa mann á Bessastaði sem verður múlbundinn. Ég vona að þið ætlið að kjósið mann sem ætlar að tjá sig um það sem að varðar ykkur og afkomu ykkar í landinu. Það er það sem að forsetinn á að gera.“ Þetta sagði Sturla Jónsson, forsetaframbjóðandi, á Morgunvaktinni á Rás 1.

Guðni Th. Jóhannesson og Andri Snær Magnason segja að ákvörðun Ólafs Ragnars Grímssonar um að hætta við framboð sitt hafi ekki komið þeim á óvart. Guðni segir að menn þurfi ekki annað en að skoða nýársávarp forsetans. Andri Snær segir eitt víst - eitthvað stórkostlega óvænt eigi eftir að koma í ljós í næstu viku. Halla Tómasdóttir segir að þessi ákvörðun forsetans hafi legið í loftinu.