Nærri helmingur sveitarfélaga landsins hunsaði ítrekaðar óskir starfshópsins sem skilaði skýrslu í dag og skoðaði meðferð á fólki með fötlun og geðræn vandamál. Meðal þeirra sveitarfélaga eru bæði fjórðu og fimmtu fjölmennustu sveitarfélög landsins. Framkvæmdastjóri Þroskahjálpar segir vanta betra eftirlit með þessu berskjaldaða fólki. 

Héðinn Unnsteinsson, formaður Geðhjálpar, segir of litlu fjármagni varið í geðheilbrigðismál. „Við erum bara með fimm, sex prósent af heildarútgjöldum til heilbrigðismála í geðheilbrigðismál samkvæmt nýrri rétt óútkominni skýrslu Ríkisendurskoðunar sem er að koma vonandi í þessari eða næstu viku. Þannig að það vantar klárlega í fjármagn málaflokkinn og hefur gert í langan tíma,“ segir Héðinn.

Formaður Geðhjálpar kveðst binda miklar vonir við að rannsóknir á ofskynjunarlyfjum á borð við psilocybin leiði til þess að samþykkt verði meðferð við geðsjúkdómum. Forstjóri Íslenskrar erfðagreiningar segir brýnt að sýna fram á að lyfin reynist ekki skaðleg.

Samtökin Geðhjálp segja fjárlagafrumvarp og stjórnarsáttmála ríkisstjórnarinnar skorta yfirsýn í geðheilbrigðismálum. Grímur Atlason, framkvæmdastjóri samtakanna, segir frumvarpið vera vonbrigði og kallar eftir betra samráði við fagaðila. Hann segir fjárhæðirnar sem ætlaðar séu í málaflokkinn séu aðeins dropi í hafið og þá sérstaklega á tímum heimsfaraldurs sem margfaldi þjónustuþörfina.

Grímur Atlason framkvæmdastjóri Geðhjálpar segir mál mikið fatlaðs manns sem hefur verið vistaður á réttargeðdeild í fjögur ár án allrar nauðsynlegrar þjónustu vera fjarri hugmyndum nútímans um hvernig slíkar deildir eigi að vera reknar.

Geðhjálp veltir fyrir sér getu embættis landlæknis til að sinna eftirliti með heilbrigðisstofnunum, og viðrar áhyggjur vegna viðbragða stjórnenda Landspítalans í kjölfar gagnrýnna ábendinga sem settar hafa verið fram um starfsemi réttargeðdeildar spítalans.

„Áríðandi er að málefnalega sé unnið með kvartanir og ábendingar sem berast, svo unnt sé að bæta brotalamir, séu þær fyrir hendi. Það er það vinnulag sem Landspítali viðhefur í öllum slíkum málum og stendur sú vinna yfir á spítalanum,“ segir í yfirlýsingu sem Landspítalinn sendi frá sér í dag til að bregðast við fréttaflutningi fréttastofu síðustu daga um ábendingar um slæman aðbúnað á öryggis- og réttargeðdeildum spítalans.

Það er með ólíkindum hvernig komið er fram við skjólstæðinga á öryggis- og réttargeðdeildum Landspítalans. Þetta segir formaður Geðhjálpar um það sem fram kemur í gögnum sem Embætti landlæknis hefur nú til skoðunar. Hann segir að ofbeldið, refsikúltúr og starfsandinn á deildunum sé það alvarlegasta sem fram kemur í gögnunum.

Embætti landlæknis hefur til athugunar alvarlegar ábendingar um slæman aðbúnað á öryggis- og réttargeðdeildum Landspítalans. Þar er meðal annars lýst ofbeldi, lyfjaþvingunum, ógnarstjórnun og miklum samskiptavanda. Ábendingarnar koma frá núverandi og fyrrverandi starfsmönnum. Þær voru meðal annars teknar saman í kjölfar umfjöllunar um vistheimilið Arnarholt. Landlæknisembættið hefur farið í vettvangsheimsóknir vegna málsins og Landspítalinn hefur tekið viðtöl við fjölda starfsmanna.

Héðinn Unnsteinsson formaður Geðhjálpar tók við hálfrar milljón króna styrk úr minningarsjóði Gunnars Thoroddsen í gær. Fámenni var við athöfnina í Ráðhúsi Reykjavíkur.

Mikilvægt er að komast til botns í hvað gerðist í Arnarholti og víðar, segir heilbrigðisráðherra. Frásagnir af þeirri meðferð sem vistmenn í Arnarholti sættu séu hræðilegar og átakanlegar. Ráðherra segist ætla að beita sér eins og henni sé unnt til að allt verði dregið fram í dagsljósið. 

Undirskriftasöfnun Geðhjálpar í tengslum við átakið 39 lauk á sunnudag og forsvarsmenn Geðhjálpar vonast til að geta afhent Svandísi Svavarsdóttur heilbrigðisráðherra undirskriftirnar 30.092 á morgun. Grímur Atlason, framkvæmdastjóri Geðhjálpar, segir í samtali við fréttastofu að með átakinu hafi félagið viljað hvetja stjórnvöld og samfélagið allt til að setja geðheilsu í forgang og leggja áherslu á geðvernd og fyrirbyggjandi aðgerðir.