Færslur: Embætti sóttvarnalæknis

Bæði opnir bólusetningadagar og handahófskennt í júní
Í næsta mánuði verður fólk boðað handahófskennt í bólusetningar og ekki farið eftir aldursröð. Þá er einnig stefnt á að hafa opna bólusetningadaga þar sem fólk getur bókað sig í bólusetningu með því bóluefni sem það helst kýs.
Bóluefnin virka þótt engar aukaverkanir fylgi
Þórólfur Guðnason sóttvarnalæknir segir að þótt fólk finni ekki fyrir aukaverkunum eftir bólusetningu, þýði það ekki að bóluefnið virki ekki sem skyldi. Fjölmargir sem farið hafa í bólusetningu hafa fundið fyrir aukaverkunum í kjölfarið, og hefur komið fram að það sé merki um að bóluefnið sé að virka. Þórólfur segir hins vegar að fólk sem finnur ekki fyrir aukaverkunum þurfi ekki að hafa áhyggjur, því bóluefnið geti vel virkað án þess að því fylgi aukaverkanir.
Viðtal
Fólk getur ekki hafnað AstraZeneca og fengið annað efni
Kamilla Sigríður Jósefsdóttir, læknir og sérfræðingur í sóttvörnum hjá embætti landlæknis, segist skilja áhyggjur fólks af bóluefninu AstraZeneca. Þeir sem taldir eru í lítilli áhættu á að fá alvarlegar aukaverkanir geti hins vegar ekki hafnað bóluefninu og ætlast til þess að fá eitthvað annað. „Eins og staðan er núna er það AstraZeneca eða ekkert,“ segir Kamilla. Það verði ekki fyrr en í fyrsta lagi einhvern tímann í sumar sem unnt verði að bjóða fólki annað.
„Við erum búin að hægja mjög á öllu í samfélaginu“
Öll starfsemi í Þorlákshöfn er í hægagangi vegna fjölda smita sem hafa komið þar upp síðustu daga. Þetta segir Elliði Vignisson, bæjarstjóri Ölfuss. Á vef HSU eru tveimur fleiri skráðir í einangrun í dag en í gær, og því eru staðfest smit í sveitarfélaginu orðin 13.
Hjón með þriggja mánaða barn kæra skyldusóttkví
Hjón með þriggja mánaða gamalt barn hafa kært þá ákvörðun stjórnvalda að vera skikkuð í sóttkví í sóttvarnahúsi er þau komu til landsins. Fólkið krefst þess að því verði birt ákvörðun sóttvarnalæknis um að þau skulu vera í sóttvarnahúsi og að sú ákvörðun verði borin undir héraðsdóm.
Myndskeið
Málið gæti haft fordæmisgildi í sóttvarnaaðgerðum
Búist er við að Héraðsdómur Reykjavíkur muni á morgun úrskurða í þremur málum sem varða sóttkví á sóttkvíarhótelinu sem fólk frá skilgreindum há-áhættusvæðum er  skikkað í við komuna til landsins. Lögmenn fólksins segja að það hafi ekki verið upplýst um hvers vegna það þarf að dvelja á hótelinu í stað þess að fá að vera heima hjá sér. Meðal þeirra sem hafa leitað til þeirra til að kanna réttarstöðu sína er par með ungt barn.
Koma til landsins til að sjá gosið og hunsa sóttkví
Þórólfur Guðnason sóttvarnalæknir segir það áhyggjuefni að  erlendir ferðamenn komi hingað til lands í stuttar ferðir til að sjá eldgosið í Geldingadölum og virði þannig sóttkví að vettugi. Erfitt sé að bregðast við slíku. 
Myndskeið
Getur ekki lofað því að áfram gjósi næstu vikurnar
Ekki er hægt að segja til um það hvort eldgosið í Geldingadölum vari í nokkrar vikur eða skemur, segir Kristín Jónsdóttir náttúruvársérfræðingur. Þó sé heldur meiri kraftur í gosinu í dag en í gær.
Smit utan sóttkvíar tengist gosstöðvum á Reykjanesskaga
Smit greindist í gær í manneskju utan sóttkvíar sem hefur starfað við ferðaþjónustu við gosstöðvarnar á Reykjanesskaga. Sóttvarnalæknir ræður fólki frá því að leggja leið sína að gosinu. Þar séu sameiginlegir snertifletir eins og kaðall í brekku. Þá segir hann að enn sé hætta á að smitum fjölgi.
Stórt verkefni að skylda alla í sóttvarnahús
Ráða þarf fjölda starfsmanna og auka við húsakost verði allir ferðamenn sem koma til landsins skyldaðir til að dvelja í sóttvarnahúsum eins og sóttvarnalæknir leggur til. Sjúkratryggingar vilja nota hótel í nágrenni Keflavíkurflugvallar sem sóttvarnahús.
Fleiri mega skíða frá og með deginum í dag
Reglum um sóttvarnaaðgerðir á skíðasvæðum hefur verið breytt og nú mega fleiri vera á skíðasvæðum landsins eða helmingur af leyfilegum hámarksfjölda gesta. Þá er veitingasala heimil á skíðasvæðum. Þetta kemur fram í reglum sem sóttvarnalæknir, Samtök skíðasvæða og Samband íslenskra sveitarfélaga sendu frá sér í morgun.
Leggur ekki til að fólk felli grímuna á næstunni
Þórólfur Guðnason býst við að hann komi seint með þau tilmæli að fólk felli grímurnar, ýmis starfsemi, á borð við krár og líkamsræktarstöðvar sé viðkvæmari en önnur og því þurfi að fara að öllu með gát. 
Viðtal
Býst við að tilslakanir taki fljótlega gildi
Sóttvarnalæknir býst við að þær tillögur sem hann leggi til við heilbrigðisráðherra, öðru hvoru megin við helgina, taki gildi áður en núverandi reglur falla úr gildi. Bíða verði í hálfan mánuð hið minnsta með næstu tilslakanir. Mikilvægt sé að fara mjög varlega í tilslakanir, segir Þórólfur Guðnason sóttvarnalæknir. Lagðar verði til vægar breytingar í fyrstu atrennu. 
„Ég held þetta sé léttir fyrir alla þjóðina“
Þórólfur Guðnason, sóttvarnalæknir, fagnar því að heilbrigðisráðherra hafi fallist á tillögu hans um skimunarskyldu fyrir alla sem koma til landsins. Betra sé seint en aldrei.
Mynd með færslu
Í BEINNI
Ríkisstjórnin ræðir aðgerðir á landamærunum
Á ríkisstjórnarfundi í dag verður rætt um heimildir til sóttvarnaaðgerða á landamærunum. Búast má við að í framhaldinu verði gefin út ný reglugerð þar að lútandi.
Ekki hægt að gera áætlanir fyrir fleiri bóluefni núna
Þórólfur Guðnason sóttvarnalæknir segir allt vera uppi á borðum varðandi komu bóluefna hingað til lands. Undirbúningur bólusetninga hafi gengið vel og að ekkert sé óljóst í þessum efnum. Ekki hefur verið ákveðið hver fær fyrstu bólusetninguna hér á landi. Þingmenn Miðflokksins hafa farið fram á að Alþingi komi saman á milli jóla og nýárs vegna óvissu um komu bóluefna. Aðrir stjórnarandstöðuflokkar taka undir þetta. 
Þeir sem sækja á völlinn þurfa í sóttkví
Fólk sem velur að sækja sína nánustu á flugvöllinn skuldbindur sig til þess að fara í sóttkví. Þetta segir Þórólfur Guðnason sóttvarnalæknir.
„Það þarf ekkert mikið til að hópsmit blossi upp“
Afar mikilvægt er á því stigi sem kórónuveirufaraldurinn er á núna að fólk komi ekki saman umfram þann fjölda sem sóttvarnareglugerð kveður á um.  Þetta segir Þórólfur Guðnason sóttvarnalæknir. Hann segir að hafi sú verið raunin um helgina, megi búast við aukningu smita síðar í vikunni.
Líklega ekki bólusett á öllum stöðum á landsbyggðinni
Þórólfur Guðnason sóttvarnalæknir segir að þó svo að geyma þurfi og flytja bóluefnið frá Pfizer við kórónuveirunni í áttatíu stiga frosti, komi það ekki í veg fyrir að það verði notað á landsbyggðinni. Gerðar hafi verið áætlanir um flutning á bóluefninu um landið. Líklega verði þó ekki bólusett á öllum stöðum á landsbyggðinni.
Tölur næstu daga munu skýra stöðuna
Þórólfur Guðnason sóttvarnalæknir sagði á upplýsingafundi almannavarna í morgun að vissulega berist jákvæðar fréttir af færri kórónuveirusmitum en lítið megi út af bregða til að þróunin snúist við.  Hann sagði að til að bæla faraldurinn niður yrði þátttaka í bólusetningu að vera 60-70%. Nýtt viðvörunarkerfi fyrir kórónuveirufaraldurinn var kynnt á fundinum.
Viðtal
Sóttvarnalæknir endurskoðar tillögur að tilslökunum
Þórólfur Guðnason sóttvarnalæknir skilaði heilbrigðisráðherra á miðvikudag minnisblaði með tillögum um áframhaldandi sóttvarnaaðgerðir. Í þeim fólust hægfara tilslakanir á ýmsum sviðum. Þórólfur hefur beðið ráðherra með að bíða með aðgerðir og hyggst endurskoða sínar tillögur. Þetta er vegna fjölgunar kórónuveirusmita. Hann biðlar til fólks að forðast alla hópamyndun. Smit síðustu daga séu rakin til veisluhalda og hópamyndunar innan sem utan fjölskyldna.
Myndskeið
Nýtt spálíkan á leið í hagstæða átt
Forsvarsmaður spálíkans Háskóla Íslands um þróun kórónuveirufaraldursins segir leiðina vera í rétta átt en það gangi hægt. Mikill vöxtur á faraldrinum í nágrannalöndunum geti sett strik í reikninginn ef ekki farið með gát. 
Þórólfur: „Þetta er ekki spretthlaup, heldur langhlaup“
Þórólfur Guðnason sóttvarnalæknir segir ljóst að kórónuveirufaraldurinn sé í línulegum vexti. Ekki sé þörf á hertum sóttvarnaraðgerðum en hann vinnur nú að minnisblaði til heilbrigðisráðherra þar sem hann leggur til áframhaldandi aðgerðir.
Hver smitaður utan sóttkvíar smitar þrjá aðra
Hver smitaður einstaklingur sem ekki er í sóttkví smitar að jafnaði þrjá aðra hér á landi. Prófessor í líftölfræði segir að hraðinn á smitunum sé mjög mikill sem endurspegli mikla virkni og samskipti á milli fólks í samfélaginu. Hann segir að aðalatriðið núna sé að fara að tilmælum almannavarna.
Reglurnar hertar vegna fjölgunar smita í seinni skimun
Of snemmt er að gera upp árangur af hertum aðgerðum á landamærum, sem nú fela í sér að skimað er tvisvar með fimm daga sóttkví á milli. Þetta segir Kamilla Sigríður Jósefsdóttir, staðgengill sóttvarnarlæknis.