Hvað er Textavarpið?

Textavarpið er einn af miðlum Ríkisútvarpsins og er gamalgróin frétta- og upplýsingaveita. Á Textavarpinu finnur þú fréttir frá fréttastofu RÚV auk gagnlegra upplýsinga um dagskrá fjölmiðla, veður, færð á vegum, flug og vegasamgöngur, rútuferðir, íþróttir, dagskrá Alþingis, gengi gjaldmiðla og fleira. Þessar upplýsingar eru nær alfarið uppfærðar beint í gegnum gagnaveitur samstarfsaðila svo sem Vegagerðarinnar, Alþingis, flugfélaga, Íslenskrar getspár og annarra fjölmiðla. Útsending þess hófst í Sjónvarpinu á 25 ára afmæli RÚV, 30. september árið 1991, og frá 1997 er líka hægt að nálgast Textavarpið á netinu.

Á síðu 888 í textavarpinu er aðalfréttatíminn og íþróttafréttir í sjónvarpi textaðar sem og allt innlent sjónvarpsefni sem ekki er í beinni útsendingu. Við vinnum einnig að því að gera 888-textaþjónustuna aðgengilega á RÚV.is.