Norðurland

Framkvæmdastjóri Markaðsstofu Norðurlands segir það draumsýn að ferðaþjónustan geti haldið af stað af krafti eftir covid án þess að fá til þess aukinn stuðning. Það verði átak að fá hjólin til að snúast aftur og mikil samkeppni sé fram undan um ferðamenn.

Fátíð sjón blasti við Stefani Lohmani á Höfða II í Eyjafirði í síðustu viku. Stefani rakst þá á dauðan norðsnjáldra í Bót, nærri bæ hennar sem er skammt sunnan við Grenivík. Norðsnjáldrar eru af ætt svínhvala og halda sig mest djúpt á hafi úti, fjarri landi. Frá því Hafrannsóknastofnun hóf skipulagða skráningu hvalreka árið 1980 er aðeins vitað um níu skipti þar sem norðsnjáldra hefur rekið á land, að þessu skipti meðtöldu.

Framkvæmdanefnd Andrésar andar leikanna sem haldnir eru árlega í Hlíðarfjalli, ofan Akureyrar hafa ákveðið að fresta þeim um þrjár vikur vegna faraldursins. Þetta kemur fram í tilkynningu frá forsvarsmönnum mótsins.

Rannsókn á skemmdarverkum sem unnin voru í Ólafsfjarðargöngum í mars, þegar þar var sprengd heimagerð sprengja, er enn í fullum gangi. Sprengjan var sú stærsta sinnar tegundar sem sprengd hefur verið í þessum tilgangi á Íslandi. Refsing við brotinu getur verið allt að sex ára fangelsi.

Miklar krapastíflur eru nú í Laxá í Aðaldal. Hefur áin flætt yfir bakka sína á nokkrum stöðum og yfir tún og girðingar. Flóðið virðist vera í rénun eins og sakir standa. Benedikt Kristjánsson, bóndi á bænum Hólmavaði í Aðaldal, óttast að miklar skemmdir hafi orðið á túnum og á einum stað náði flóðið að gistiskála skammt frá bænum.

Sextíu og fimm ára gömul leigubílastöð BSO í miðbæ Akureyrar þarf að víkja fyrir nýju miðbæjarskipulagi. Bílstjórarnir vilja vera áfram í miðbænum en óvíst er hvað verður um þetta sögufræga hús.

Stjórn Akureyrarstofu hefur lýst yfir áhuga á að varðveita verk eftir listamanninn Margeir Dire á húsvegg í Listagilinu á Akureyri. Safnstjóra Listasafnsins á Akureyri hefur verið falið að ræða við aðstandendur og vini Margeirs auk KEA, sem á húsvegginn, um hugsanlegt samstarf. Margeir, sem ólst upp á Akureyri, lést aðeins 34 ára fyrir tveimur árum.

Í fyrra varð til nýtt sveitarfélag á Íslandi, Múlaþing. Þar voru sameinuð sveitarfélögin Borgarfjörður eystri, Djúpivogur, Fjótsdalshérað og Seyðisfjörður eftir að íbúar samþykktu fyrirkomulagið í kosningu haustið 2019. Íbúar Múlaþings eru um 5000 og langt er á milli byggðarkjarna og yfir fjallvegi að fara. Til að íbúar á jaðarsvæðum gætu haft áhrif á gang mála í sinni heimabyggð var búin til ný tegund stjórnskipulag, heimastjórnir.

Veðurstofan hefur gefið út gular viðvaranir vegna óveðurs sem gengur yfir landið á morgun og páskadag. Útlit er fyrir suðvestanhvassviðri eða storm á Norðurlandi á morgun. Einkum er útlit fyrir vont veður á Tröllaskaga og í Skagafirði og Eyjafirði. Suðvestanstormi er líka spáð á gosstöðvunum á morgun og verður lokað fyrir umferð að þeim allan daginn.

Íbúar ellefu sveitarfélaga greiða í ár atkvæði um að sameinast nágranna sveitarfélögum sínum. Þreifingar eða viðræður í sameiningarátt standa yfir á fimmtíu og einu prósenti landsins - landfræðilega séð. Þar búa um 6% íbúa. Talsverð hreyfing hefur verið í sameiningu sveitarfélaga undanfarin misseri. Tvö ný sveitarfélög hafa orðið til á síðustu árum; Múlaþing á Austurlandi og Suðurnesjabær á Suðurnesjum. Nú eru sveitarfélög landsins 69 og talsverðar líkur á að þeim fækki á næstunni.

Sprengingin í Múlagöngum á dögunum er að mati bæjarstjórans í Fjallabyggð áminning um að göngin eru klædd innan með eldfimu efni. Hann undrast að lögregla skyldi ekki tilkynna bæjaryfirvöldum strax um atburðinn.

Hermann Karlsson, aðalvarðstjóri hjá Lögreglustjóranum á Norðurlandi eystra, hefur verið ráðinn í fullt starf til að sinna verkefnum við almannavarnir. Ráðningin er tímabundin í fyrstu og er til næstu áramóta.