Segir skipta máli að arður af auðlind skili sér til þjóðarinnar
Mikill áhugi er hjá einkafyrirtækjum að reisa vindorkuver á Íslandi. Halla Hrund Logadóttir orkumálastjóri segir að lagarammi um auðlindanýtingu þurfi að vera þannig að arður af auðlind skili sér til þjóðarinnar.
Með þróun í vindorkutækni hafa vindmyllur stækkað, bæði að umfangi og afli, og vindorkuframleiðsla hefur orðið hagkvæmari. Tugir hugmynda hafa verið settir fram um vindorkuver á Íslandi. Margar hugmyndir eru frá einkafyrirtækjum.
Halla Hrund Logadóttir orkumálastjóri segir að Ísland sé í raun hluti af Evrópulöggjöf á þessu sviði. Í slíku samkeppnisumhverfi séu fleiri leikendur að koma inn. „Og það erum við að sjá hérna á Íslandi líka,“ segir hún, til dæmis á sviði vindorkunnar, og frekari þróun eigi eftir að verða í þá átt á komandi árum.
Hún segir að í auðlindanýtingu skipti máli að lagaramminn sé þannig „að arðurinn af auðlindinni skili sér til þjóðarinnar.“
„Þannig að í upphafi skal endinn skoða með alla auðlindanýtingu, sama hvort það er fiskurinn í sjónum eða orkan okkar,“ segir Halla. „Þannig að vandvirkni og framsýni, það að við séum að hugsa vel fram í tímann, og passa upp á að lög og reglur styðji við okkar framtíðarsýn, það er eitthvað sem skiptir mjög miklu máli.“
Fjallað verður um hugmyndir um byggingu vindorkuvera á Íslandi og umhverfisáhrif slíkra virkjana í fréttaskýringaþættinum Kveik í kvöld klukkan 20:05 á RÚV.