RÚV okkar allra
Hér upplýsum við um starfsemina, bjóðum upp á samtal og svörum spurningum þínum

Menningarviðurkenningar RÚV 2021

Mynd með færslu
 Mynd: Forlagið - RÚV
Menningarviðurkenningar RÚV voru kynntar á Rás 1 og Rás 2 í dag, auk þess sem valið á orði ársins 2021 var kunngjört. Kristín Helga Gunnarsdóttir hlýtur verðlaun rithöfundasjóðs Ríkisútvarpsins. Það var samdóma álit stjórnar sjóðsins að beina sjónum að barnabókmenntum í ár.

„Alkunna er að mikil gróska hefur verið í útgáfu barnabóka síðustu ár og misseri. Höfundarnir eru mýmargir og segja má að barnabókin sé oft mun pólitískari nú í seinni tíð og flytji ungu fólki kröftugan boðskap,“ sagði Guðjón Ragnar Jónasson, formaður stjórnar, í ávarpi sem flutt var í Víðsjá á Rás 1. „Kristín leggur líka áherslu á að hún skrifi fjölskyldubókmenntir: Bækur sem fullorðnir og ungir lesi saman. Þannig styrkjum við sagnahefðina sem einkennt hefur samfélögin um aldir.“

Kristín Helga segir í viðtali við Jórunni Sigurðardóttur að hún vilji með því sporna við markaðsöflunum. „Mér finnst svo óþolandi að markaðskerfi hafa ruðst inn í þessa listgrein, ritlistina, og krefja okkur um aldurstakmark á bókum,“ segir hún og vísar til verslana og söluaðila bóka sem vilja merkja barnabækur eftir aldursflokkum. „Ég þarf að segja að mín bók sé fyrir káta krakka á einhverjum aldri, að vísu þarf ég ekki að segja fyrir drengi og stúlkur lengur, þakka skyldi. En ef ég skrifa fyrir fullorðna þá þarf ég ekki að gera það. Sem þyrfti kannski að gera? Fyrir káta karla á aldrinum 45-65 til dæmis? En þetta eru takmörk, við erum að reisa veggi og hefta listgrein. Um leið og þú flytur þig yfir í aðrar listgreinar þá er enginn sem krefur myndlistarmann eða kvikmyndagerðarmann um að aldursgreina alveg niður í mánuði hvað barnið á að vera gamalt til að geta notið listarinnar.“

Óróapúls er orð ársins

Niðurstöður kosningar RÚV.is um orð ársins voru einnig kynntar. Á listanum í ár voru 15 orð: Blóðmeri, bólusetningaröfund, byrlun, gerendameðvirkni, hitamet, hraðpróf, kvár, óróapúls, útilokunarmenning, stálp, sviðsmynd, undirbúningskjörbréfanefnd, úrkomuákefð, úrvinnslusóttkví og örvunarskammtur. Orðið óróapúls varð hlutskarpast í kosningu, örvunarskammtur og gerendameðvirkni fylgdu á eftir, en mjótt var á munum.

Einnig var tilkynnt um úthlutun úr tónskáldasjóði Ríkisútvarpsins og STEFs árið 2021. Sjóðurinn hefur það markmið að stuðla að frumsköpun og útbreiðslu íslenskrar tónlistar. Alls voru veittir 75 styrkir úr sjóðnum.

Tónlistarkonan Bríet hlaut Krókinn, viðurkenningu Rásar 2, fyrir útgáfutónleika sem fram fóru í Eldborgarsal Hörpu í haust þar sem hún flutti lög af plötu sinni Kveðja, Bríet. Tilkynnt var um viðurkenninguna í Popplandi á Rás 2.

11.01.2022 kl.09:53
davidkg's picture
Davíð Kjartan Gestsson
vefritstjórn
Birt undir: Í umræðunni, Í umræðunni, Menningarviðurkenningar RÚV