RÚV okkar allra
Hér upplýsum við um starfsemina, bjóðum upp á samtal og svörum spurningum þínum

Margrét Jónasdóttir nýr aðstoðardagskrárstjóri RÚV

Mynd með færslu
 Mynd: RÚV

Margrét Jónasdóttir hefur verið ráðin í starf aðstoðardagskrárstjóra RÚV þar sem hún mun hafa faglega umsjón með innkaupum og framleiðslu á heimildaefni ásamt því að leiða hugmyndavinnu, þróun, stefnumótun og gæðaeftirliti með öllu heimildaefni fyrir sjónvarp í samstarfi við dagskrárstjóra.

Margrét er með MA próf í samtímasögu frá University College London og hefur lagt stund á MA-nám í menningarstjórnun við Háskólann á Bifröst. Hún á að baki langan og farsælan feril í framleiðslu og handritsskrifum heimildarmynda, lengst af í starfi yfirmanns heimildarmyndadeildar og aðalframleiðanda hjá Sagafilm. Meðfram framleiðandastarfi hefur Margrét gegnt ýmiss konar nefndarstörfum og setið í stjórnum og dómnefndum sem tengjast kvikmyndagerð og heimildarmyndaframleiðslu, bæði hérlendis og erlendis.

„Reynsla Margrétar, fyrri störf hennar og menntun gera að verkum að hún býr yfir afar yfirgripsmikilli þekkingu á framleiðslu heimildaefnis sem mun tvímælalaust nýtast í starfi hennar fyrir RÚV og almennt reynast íslenskri heimildarmyndagerð afar vel,“ segir Skarphéðinn Guðmundsson, dagskrárstjóri sjónvarps hjá RÚV. „Framundan eru spennandi verkefni við að skerpa á ferlum í kringum framleiðslu og innkaup heimildaefnis til að styrkja enn frekar stöðu heimildaefnis í dagskrárframboði RÚV, bæði í línulegri dagskrá og spilara. Það er mikill fengur í að fá Margréti til að leiða þá mikilvægu vinnu.“

Margrét tekur formlega til starfa 1. september í dagskrárdeild sjónvarps hjá RÚV.

 

 

05.07.2022 kl.15:20
sigrunh's picture
Sigrún Hermannsdóttir
Birt undir: Í umræðunni, Í umræðunni