Yfir 500 hafa dáið úr ebólu síðan í ágúst

Mynd með færslu
Heilbrigðisráðherra Kongó, Oly Ilunga Kalenga, hrindir úr vör bólusetningarherferð sem talin er hafa bjargað þúsundum mannslífa í yfirstandandi ebólufaraldri í landinu Mynd:
Yfir 500 hafa nú látist í ebólufaraldrinum sem geisað hefur í Lýðstjórnarlýðveldinu Kongó að undanförnu. Heilbrigðisráðherra landsins greindi frá þessu í gær. Í tilkynningu frá ráðuneyti hans segir að 502 dauðsföll af völdum ebóluveirunnar hafi verið staðfest síðan faraldurinn braust út í austurhluta landsins í ágúst í fyrra, en tekist hefði að lækna 271, sem smitast hefði af veirunni á sama tíma.

Bólusetning hefur bjargað þúsundum

Ráðherrann, Oly Ilunga Kalenga, segir að tekist hafi að bólusetja ríflega 76.000 manns þar sem faraldurinn geisar og bjarga þannig þúsundum mannslífa, í fyrstu árangursríku bólusetningarherferðinni gegn þessum skæða sjúkdómi. Segist hann sannfærður um að með bólusetningunum hafi tekist að koma í veg fyrir að faraldurinn brytist út í stærstu borgunum á þessu svæði og hindra að hann teygði sig til nágrannaríkjanna.

Næst-mannskæðasti ebólufaraldur sögunnar

Faraldurinn braust út í Kivu-héraði í norðausturhluta landsins, sem liggur að Úganda og Rúanda. Yfirstandandi faraldur er tíundi ebólufaraldurinn sem upp hefur komið í Kongó síðan 1976 og sá mannskæðasti sem geisað hefur þar í landi. Einungis faraldurinn í Vestur-Afríku 2013 - 2016 var mannskæðari. Þá dóu ríflega 11.000 manns í Líberíu, Sierra Leone og Gíneu úr ebólu áður en yfir lauk og yfir 17.000 til viðbótar veiktust. 

Ævar Örn Jósepsson
Fréttastofa RÚV
Síðast:
Þessi þáttur er í hlaðvarpi