Vísar ásökunum Þóru á bug

Mynd með færslu
 Mynd: RÚV

Vísar ásökunum Þóru á bug

17.08.2018 - 18:20
Þórður Georg Lárusson, fyrrverandi landsliðsþjálfari kvennalandsliðs Íslands í knattspyrnu, hefur sent frá sér yfirlýsingu vegna fyrirlesturs Þóru Bjargar Helgadóttur, fyrrverandi landsliðskonu, á alþjóðlegri ráðstefnu um jafnrétti í íþróttum í gær.

Þóra flutti erindi þar sem hún talaði um slakan aðbúnað kvennalandsliðsins á þeim tíma er hún lék með því. Æfingar hafi verið auðveldar, æft á slökum völlum og 13 ára strákur með engan íþróttabakgrunn fenginn til að vera með á æfingum.

Nefndi þjálfarann aldrei á nafn

Enn fremur sagði hún þjálfara sem ráðinn var fyrir um 20 árum ekki hafa þekkt nöfn leikmanna og ekki vitað hvaða stöður þeir spiluðu. Þá sagði Þóra að í einni keppnisferð hafi þjálfarinn verið drukkinn og boðið leikmönnum upp á herbergi til sín.

Þóra nefndi viðkomandi þjálfara aldrei á nafn, hvorki í fyrirlestrinum né í viðtölum.

Yfirlýsing Þórðar

Þórður Georg hefur nú sent frá sér yfirlýsingu vegna málsins en hana má lesa í heild sinni hér að neðan.

Til þeirra sem málið varðar

Á ráðstefnu Háskólans í Reykjavík í gær, sem bar yfirskriftina „Kyn og íþróttir“ hélt Þóra Helgadóttir tölu undir yfirskriftinni „Girl in a man‘s world – A story from a former professional football player“. Í máli sínu vék hún að undirrituðum og bar mig alvarlegum ávirðingum.

Þær ásakanir eiga ekki við nein rök að styðjast.

Svo langt var gengið að vísa til þess að ég eigi að hafa verið drukkinn í landsliðsverkefni og reynt að fá leikmenn liðsins uppá herbergi með mér. Þessum ásökunum vísa ég alfarið á bug.

Ég hef aldrei á starfsævi minni blandað saman áfengi og vinnu og því síður hefði mér dottið í hug að reyna að fá leikmenn til þess að koma upp á herbergi með mér. Það geta þeir sem mig þekkja vitnað til um. Það er ljóst að ef ég hefði verið undir áhrifum áfengis og freistað þess að misnota stöðu mína hefði verið tekið strax á slíku máli.

Mér er misboðið að vegið sé að persónu minni og æru með svona aðdróttunum.

Ég hef alla tíð freistað þess að leggja mig allan fram í verkefnum mínum, hvaða nafni sem þau nefnast. Það kann vel að vera að leikmenn liðsins hafi verið ósáttir við þjálfunaraðferðir mínar, enda lögðust þær gegn því að ég héldi áfram með liðið. Það er eitt. Það er hins vegar allt annað að bera mig alvarlegum ásökunum um að ég hafi freistað þess að misnota aðstöðu mína. Það myndi ég aldrei gera og vísa ég þeim ásökunum algerlega á bug.

Ég mun ekki tjá mig frekar um þetta mál.

Þórður Georg Lárusson

Tengdar fréttir

Fótbolti

Ásakar landsliðsþjálfara um ósæmilega hegðun