Mynd: RÚV
Athugið þessi frétt er meira en 2 ára gömul.
Vill flokksráðsfund vegna Gunnars og Bergþórs
Birgir Þórarinsson, þingmaður Miðflokksins, hefur óskað eftir því við formann flokksins að boðað verði til flokksráðsfundar vegna þeirrar stöðu sem upp er komin eftir Klausturmálið. Hann telur ekki rétt að Gunnar Bragi Sveinsson og Bergþór Ólason geti gengið að óbreyttu fyrirkomulagi að trúnaðarstörfum sínum fyrir flokkinn vísum.
Greint var fyrst frá yfirlýsingu Birgis í hádegisfréttum Bylgjunnar.
Gunnar Bragi og Bergþór sneru nýverið aftur til starfa sem þingmenn eftir að hafa farið í tímabundið leyfi eftir Klausturmálið. Gunnar Bragi er þingflokksformaður flokksins en Bergþór er formaður samgöngunefndar Alþingis. Uppnám varð í samgöngunefnd í gær þegar minnihlutinn ásamt Rósu Björk Brynjólfsdóttur, þingmanni Vinstri grænna, lögðu til að Bergþór myndi víkja sem formaður. Tillögunni var vísað frá.
Í yfirlýsingunni segir Birgir jafnframt að hann sé ekki á leiðinni úr þingflokki Miðflokksins eins og gefið var í skyn á forsíðu Fréttablaðsins í morgun og hann væri heldur ekki á leiðinni yfir Sjálfstæðisflokkinn. Hann geri hins vegar kröfu um ákveðna uppstokkun og hafi til þess breiðan stuðning í pólitísku baklandi sínu og félgöum sínum í Miðflokknum.
Yfirlýsingu Birgis má lesa hér að neðan.
Þessa dagana velta ýmsir fjölmiðlar því fyrir sér hvort ég hyggist segja mig úr lögum við þingflokk Miðflokksins og sé jafnvel á leið yfir í Sjálfstæðisflokkinn. Af því tilefni vil ég koma eftirgreindu með skýrum hætti á framfæri:
Mér finnst ekki rétt að þeir félagar mínir í þingflokknum sem stigu tímabundið til hliðar og sneru síðan til þingstarfa sinna á nýjan leik gangi að óbreyttu fyrirkomulagi á trúnaðarstörfum sínum fyrir flokkinn vísu. Ég hef komið þeirri skoðun minni á framfæri við formann Miðflokksins að ég telji rétt að boða til flokksráðsfundar eins fljótt og auðið er til þess að fara yfir stöðuna og stokka m.a. upp spilin í verkaskiptingu þingmanna eftir því sem þurfa þykir.
Ég er ekki á leiðinni úr þingflokknum. Ég er þar af leiðandi heldur ekki á leið yfir í Sjálfstæðisflokkinn. Ég geri hins vegar kröfu um ákveðna uppstokkun og til þess hef ég breiðan stuðning í pólitísku baklandi mínu og einnig hjá félögum mínum í Miðflokknum víðsvegar um landið.
