„Við munum ekki hvika frá okkar kröfum“

06.02.2019 - 18:52
Mynd:  / 
Formaður Eflingar sakar seðlabankastjóra um að berja niður baráttu verkafólks með hótunum og að verkalýðsfélögin muni ekkert slá af kröfum sínum. Framkvæmdastjóri Samtaka atvinnulífsins tekur undir með seðlabankastjóra að verkföll og miklar launahækkanir verði áfall fyrir efnahagslífið. 

Halldór Benjamín Þorbergsson, framkvæmdastjóri SA segir of snemmt að segja til um hvort innlegg seðlabankastjóra hafi áhrif á gang kjaraviðræðna. „Það er full ástæða til að taka mark á seðlabankastjóra. Trúverðugleiki Seðlabankans er mikill,“ segir Halldór.

Eru kröfur verkalýðsfélaganna óraunhæfar? „Ég vil ekki orða það með þeim hætti. Ef við göngum of langt við komandi kjarasamningsgerð þá mun Seðlabankinn bregðast við því eins og hann hefur gert, en þetta er enn þá í okkar höndum,“ bætir hann við.

Forystufólk í verkalýðshreyfingunni vísar því á bug að kröfur þeirra í kjarasamningum séu ógn við hagkerfið. „Þetta sýnir okkur að fólk er tilbúið til að nota hótanir til að berja niður mjög réttmæta baráttu fyrir efnahagslegu réttlæti,“ segir Sólveig Anna Jónsdóttir formaður Eflingar.

En ætlið þið ekki að taka mark á orðum Seðlabankastjóra? „Ætlar Seðlabankastjóri ekki að taka mark á orðum okkar? Við segjum og stöndum við það að þau efnahagslegu skilyrði eru óásættanleg og við krefjumst efnahagslegs réttlætis. Við munum ekki hvika frá okkar kröfum,“ segir hún.

Telur þú að ykkar kröfur gætu verið að ógna hagkerfinu? „Nei, sannarlega ekki. Við erum bara einbeitt í okkar baráttu og við ætlum ekki að slá neitt af,“ bætir Sólveig Anna við.

„Við höfum ekki talið sem svo að þær kröfur að fólk geti lifað hér mannsæmandi lífi, ógni hagkerfinu,“ segir Drífa Snædal, forseti ASÍ. Hún segir að Alþýðusambandið hafi áhyggjur af vaxtakostnaðinum. „Við vorum að samþykkja hjá miðstjórn ASÍ ályktun þar sem við skorum á stjórnvöld að stofna samfélagsbanka. við tókum undir þær raddir sem hafa heyrst að breyta Landsbankanum í samfélagsbanka sem verði óhagnaðardrifinn og það verði liður í því að stemma stigu við vaxtaokri hér á landi,“ bætir Drífa við. 

holmfridurdf's picture
Hólmfríður Dagný Friðjónsdóttir
Fréttastofa RÚV
Síðast:
Þessi þáttur er í hlaðvarpi