Athugið þessi frétt er meira en 7 ára gömul.

Vendipunktur í álagi á náttúruna

30.10.2014 - 23:06
Mynd með færslu
 Mynd:
Komið er að vendipunkti hvað varðar álag á náttúruna af völdum ferðamennsku, segir Edward H. Huijbens, forstöðumaður Rannsóknamiðstöðvar ferðamála. Rannsóknarmiðstöðin stóð fyrir ráðstefnu um málið í dag.

„Við erum á ákveðnum vendipunkti um þessar mundir með okkar milljón gesti á ári sem eru að koma og við þurfum að horfa til þess hvernig við ætlum að bregðast við. Mögulega gætum við þurft að horfa á afgerandi verndun svæða til dæmis eins og þjóðgarð í miðhálendinu, að miðhálendið verði þjóðgarður", segir Edward.

Edward segir að stjórnsýsluna og framkvæmdina við verndun náttúrunnar mætti ramma inn í Þjóðgarðastofnun eða eitthvað sambærilegt: „Það er það sem við verðum að ákveða hvaða staði við viljum byggja upp til framtíðar fyrir fjöldann, hvaða staði viljum við mögulega vernda og hugsa betur um og hver er innstæðan í ímyndinni og ástæður þess að fólkið sækir landið heim".  

Ráðherra hefur talað um náttúrupassa er eitthvað hugsað um slíkar lausnir?

„Það kom ekki ekki á þessari ráðstefnu beinlínis fram hvað við vildum gera varðandi náttúrupassann sem slíkan, en það er nú að verða nokkuð ráðandi sjónarmið að það sé nú sennilega ekki skynsamlegasta leiðin og ég er ekki viss um að náttúrupassi sé rétta lausnin. Við erum með skattaumhverfi fyrir atvinnustarfsemi á Íslandi og ég held að ef fjármunum sé varið af þeim sköttum til uppbyggingar innviða og skipulags og framtíðarsýn fyrir ferðaþjónustu að það sé betri leið", sagði Edward.