Mynd: Lögreglan á Blönduósi
Athugið þessi frétt er meira en 6 ára gömul.
Var of þungur fyrir brúna yfir Vatnsdalsá
Rannsóknarnefnd Samgönguslysa segir mikilvægt að tryggt sé að brýr þoli þann þunga sem er leyfður og beinir því til Vegagerðarinnar að taka þetta mál til sérstakrar skoðunar í ljósi þess að víða séu enn eldri brýr í notkun.
Þetta kemur fram í skýrslu nefndarinnar um slys sem varð á brúnni yfir Vatnsdalsá. Morgunblaðið greindi fyrst frá. Brúin hrundi um miðjan ágúst á síðasta ári þegar hún lét undan þunga flutningabíls sem ók yfir hana.
Í skýrslunni kemur fram að engar sérstakar þungatakmarkanir hafi verið á Vatnsdalsvegi né á brúnni og því leyfilegt að aka yfir hana með 40 tonna heildarþunga - að mati nefndarinnar var heildarþyngd flutningabílsins með festivagninum 57 tonn.
Nefndin telur jafnframt að ekki hefði átt að leyfa 40 tonna álagslest á brúnni til að tryggja að hún hefði sambærilegt öryggi og aðrar brýr og þá fannst skemmd á þrýstistöng sem skerti burðargetu hennar.
Við rannsókn á slysinu kom í ljós að öryggi burðarþols brúarinnar var ábótavant - heilbrigðis-og öryggisáætlun, sem skilað var inn til verkkaupa, var ófullnægjandi og slysið var ekki tilkynnt til Vinnueftirlitsins. Í skýrslu rannsóknarnefndarinnar segir enn fremur að ökumaður flutningabílsins hafi ekki verið í belti - hann kastaðist til þegar slysið varð og hlaut nokkra áverka.
