Athugið þessi frétt er meira en 2 ára gömul.

„Þú mátt vera mjög viðkvæmur og bleikur“

Mynd: RÚV / RÚV

„Þú mátt vera mjög viðkvæmur og bleikur“

20.04.2019 - 15:32

Höfundar

Júlía Margrét Einarsdóttir

vefritstjórn

Senda skilaboð

„Ég fór inn þarna frekar melankólísk með flensu og ég fór bara næstum að gráta,“ segir Auður Jónsdóttir rithöfundur um sýninguna Allt fínt eftir Örnu Óttarsdóttur sem nú er í Nýlistasafninu.

Í sýningunni vinnur Arna með textíl og innsetningar í bleikum og mjúkum litum. Í sýningarskrá sýningarinnar segir: Kórallituð, laxableik, spítalableik, föl, rjóð, sæt, kokteilsósa, rós, dögun, rökkur, ástin, sólarupprás, sólsetur; Arna litar orðin. Mjúkir og mildir bleikir tónar dofna og skerpast í verkunum og kalla fram hlýjar myndir: húðfellingar, pinnamat, blíða snertingu, hráleika, innvortis, útvortis, lyf, nostalgíu, örvun – allt unaðslega bleikt.

Gestir Lestarklefans, þau Auður Jónsdóttir rithöfundur, Brynhildur Karlsdóttir tónlistarkona og Kjartan Guðmundsson fjölmiðlamaður kíktu á sýningu Örnu og ræddu hana við Guðna Tómasson.

„Einhvern veginn var skynjunin svo opin þegar ég fór á sýninguna. Þetta er eins og að koma inn og það er sagt við þig: „Þú bara mátt vera mjög viðkvæmur og bleikur.“ Það eru svo margar pælingar þarna. Maður horfir á þetta og verður pínu melankólískur,“ segir Auður Jónsdótttir.

Mynd: RÚV

Brynhildur og Auður voru hrifnar af sýningu Örnu.

Brynhildur var líka hrifin af sýningunni. „Þetta hafði mikil áhrif á mig og sýningin talar vel inn í samtímann. Fyrir nokkrum árum heyrði ég lag með hljómsveitinni Eva um að það megi leggja sig á daginn og í laginu er sagt að þó hún klökkni þegar hún segir eitthvað mikilvægt á samt að taka mark á henni. Þetta var algjört „aha“ móment fyrir mig sem hef eytt miklum tíma í að reyna að vera sterk og ákveðin svo það sé hægt að taka mark á mér. Þetta var eins og að stíga inn í viðkvæmnina og fá að vera þar.“

Kjartan fór að velta fyrir sér á sýningunni hvort listamaðurinn væri aðeins að stríða áhorfendum. „Mér fannst sýningin flott. Það sem mér fannst flottast var að taka hluti sem eru gerðir eins og í hugsunarleysi eins og að krota á blað á meðan maður er í símanum eða krota á innkaupalista og færa það í vefnaðinn. Það er það sem ég tók eftir og hugsaði mest um. Mér fannst hún jafnvel stundum vera að gera smá grín að okkur. Það er einhver húmor í því að taka hlut eins og innkaupalista og færa hann í alla þessa vinnu sem er á bak við vefnaðinn.“

Lestarklefinn er umræðuþáttur um menningu og listir sem sýndur er í beinni á Menningarvef RÚV á hverjum föstudegi klukkan 17.03 og útvarpað á Rás 1.