Athugið þessi frétt er meira en mánaðargömul.

Þróa þjónustumiðstöðvar fyrir minni þorp

08.10.2015 - 12:51
Þingeyri  Dýrafjörður
 Mynd: Jóhannes Jónsson
Ísafjarðarbær vinnur nú að tilrauna- og þróunarverkefni að þjónustumiðstöðvum fyrir minni byggðir á landinu. „Þetta yrði einkonar hjarta í þessum þorpum,“ segir Gísli Halldór Halldórsson, bæjarstjóri Ísafjarðarbæjar.

Ísafjarðarbær vinnur að verkefninu í samstarfi við Nýsköpunarmiðstöð Íslands, Byggðastofnun og Fjórðungssamband Vestfirðinga.

„Hugmyndin byggir á því að skilgreina þjónustuþörf á litlum stöðum, Þingeyri, Suðureyri, Flateyri eða á hvaða litla stað sem er á landinu,“ segir Gísli Halldór. „Útbúa svo einskonar miðstöð eða aðstöðu sem sveitarfélög eða ríki halda uppi en byðu svo jafnvel fyrirtækjum að taka þátt, eins og póstinum, bönkum eða lyfjasölu. Þetta yrði miðpunktur þar sem íbúar gætu komið saman og leitað lausna, hitt hvort annað.“

Ætlunin er að hefja verkefnið á Þingeyri. Þá verður leitast við að opna þjónustumiðstöð til þriggja ára. Sú miðstöð verður nýtt til að afla reynslu og þróa verkefnið frekar. Gísli Halldór segist vonast til verkefni þannig að það verði fordæmi fyrir landið í heild: „Kæmi í staðinn fyrir þá þróun sem hefur orðið þegar stórfyrirtæki hafa þjappast saman og þá iðulega á höfuðborgarsvæðið. Við þann sparnað hafa íbúar þorpanna þurft að bera kostnaðinn.“ Gísli Halldór segist binda miklar vonir við verkefnið.

hallao's picture
Halla Ólafsdóttir
dagskrárgerðarmaður