Þrjú ný Ramsarsvæði á Íslandi

08.04.2013 - 10:56
Mynd með færslu
 Mynd:
Þrjú svæði hér á landi hafa bæst við votlendisskrá Ramsarsamningsins og eru þau nú sex. Nýju svæðin eru Eyjabakkasvæðið, friðlandið í Guðlaugstungum og verndarsvæði blesgæsa í Andakíl við Hvanneyri.

Ramsarsamningurinn er er alþjóðasamningur um verndun votlendis, sérstaklega sem lífsvæði fyrir fugla. Hann er frá 1971 og er kenndur við borgina Ramsar í Íran. Íslendingar áttu þrjú skráð svæði, Mývatn-Laxá, Þjórsárver og Grunnafjörð norðan Akrafjalls.  Markmið samningsins er að vernda votlendissvæði heimsins. Um 90 þjóðir eiga aðild að samþykktinni og í heiminum eru um 750 Ramsar svæði.

Úr tilkynningu Umhverfisráðuneytis:
Eyjabakkar er votlendissvæði milli Snæfells og Eyjabakka, um 265 ferkílómetrar að stærð og nær ofan af jökli og niður undir Hafursfell og Laugafell. Þar hafa fleiri en 30 tegundir fugla fundist. Svæðið er alþjólega mikilvægt fyrir fugla, einkum vegna þess mikla fjölda gæsa sem fellir þar flugfjaðrir og nýtir svæðið sem beitarsvæði á þessum viðkvæma og mikilvæga tíma fyrir fuglana. Svæðið er einkar fjölbreytt, með mýrum, flóum, tjörnum, vötnum, lækjum og ám. Það er friðlýst sem hluti af Vatnajökulsþjóðgarði og verður áfram undir stjórn þjóðgarðsins.

Guðlaugstungur eru norðan Hofsjökuls, gegnt Þjórsárverum í suðri. Um er að ræða um 400 ferkílómetra vorlendissvæði sem er alþjóðlega mikilvægt, einkum fyrir þann fjölda gæsa sem verpir á svæðinu og nýtir það jafnframt sem fæðusvæði. Guðlaugstungur voru friðlýstar árið 2005 en svæðið hýsir allt að 13.000 varppör gæsa á ári og þjónar sem fæðusvæði fyrir þær og þá unga sem þar komast upp árlega. Votlendi þekur um helming svæðisins, sem skiptist í heiðalönd, votlendi, mólendi og bersvæði, ár og vötn.

Verndun búsvæða fugla í Andakíl við Hvanneyri var staðfest 2002 þegar Hvanneyrarjörðin var friðlýst í heild. Svæðið var stækkað verulega árið 2011 og nær nú yfir stærstan hluta votlendis í Andakíl. Á svæðinu er fjölbreytileiki votlendis mikill og fjölmargar tegundir fugla nýta sér svæðið. Það er í farleið fugla s.s. blesgæsar og fleiri tegunda sem hafa viðdvöl á leið sinni til og frá varpstöðvum. Talið er að um 10% grænlenska blesgæsastofnsins hafi viðdvöl á verndarsvæðinu vor og haust. Svæðið er einn af mikilvægustu viðkomustöðum blesgæsa hér á landi.