Athugið þessi frétt er meira en 1 ára gömul.

Þrír fórust í þyrluslysi á frönsku Rívíerunni

02.12.2019 - 04:29
Erlent · Hamfarir · Flóð · Frakkland · Evrópa · Veður
epa08019803 General view of a flooded river due to heavy rainfalls in Pont-du-loup, near Grasse, southern Paris, France, 23 November 2019. Eleven districts in southern France have been put on alert for storms, high winds and flooding.  EPA-EFE/SEBASTIEN NOGIER
Steypiregn hefur valdið vatnavöxtum og flóðum tvær helgar í röð í sunnanverðu Frakklandi. Sex manns fórust í flóðum þar syðra fyrir rúmri viku og tveir til viðbótar nú um helgina. Mynd: epa
Þrír björgunarsveitarmenn fórust þegar þyrla þeirra hrapaði í nágrenni hafnarborgarinnar Marseille í Suður-Frakklandi í gærkvöld. Þremenningarnir voru í könnunar- og björgunarleiðangri á flóðasvæðum í Var-héraði á frönsku Rívíerunni, þar sem tveir menn drukknuðu í gær. Flak þyrlunnar og lík þremenninganna fundust svo um hálftvö aðfaranótt mánudags að staðartíma, nærri smábænum Le Rove. Rannsókn er hafin á tildrögum slyssins.

Úrhellisrigning var á Rívíerunni sunnanverðri um helgina og rauð viðvörun í gildi vegna flóðahættu í héruðunum Var og Alpes-Maritimes. Fjárhirðir í fyrrnefnda héraðinu drukknaði þegar hann freistaði þess að fara á jeppa yfir á í miklum vexti, til að sinna hjörð sinni. Vatnsflaumurinn hreif jeppann með sér og fannst fjárhirðirinn drukknaður í bílnum nokkur hundruð metrum neðar í ánni.

Eigandi hestabúgarðs í héraðinu drukknaði líka í ólgandi straumvatni þar sem hann var að gæta að stóði sínu. Flóðin ollu talsverðum usla í héruðunum tveimur, samgöngur röskuðust og fjölda menningar- og íþróttaviðburða var aflýst vegna veðurs og vatnavaxta.

Aðeins er vika síðan sex manns létu lífið vegna úrhellisrigninga og flóða í Var-héraði. 

 

Ævar Örn Jósepsson
Fréttastofa RÚV