Athugið þessi frétt er meira en 4 ára gömul.

Þrír eldislaxar í veiðiám á Vestfjörðum

03.09.2018 - 09:48
Mynd með færslu
Safnmynd. Mynd: RÚV
Hafrannsóknastofnun fékk á síðustu tveimur vikum tilkynningu um fjóra laxa sem veiddust á Vestfjörðum sem voru taldir ættaðir úr eldi. Stofnunin hefur nú greint uppruna laxana fjögurra og komist að því að þrír voru eldislaxar og einn náttúrulegur lax úr Hvannadalsá í Ísafjarðardjúpi. 

Vakta veiðiár

Á heimasíðu Hafrannsóknastofnunar kemur fram að stofnunin annist ýmsa þætti varðandi vöktun á laxveiðiám til að fylgjast með í hve miklu mæli strokulaxar úr eldi skili sér í veiðiár hluti af þessari vöktun sé að senda laxa sem grunaðir eru um að vera af eldisuppruna í arfgerðagreinungu á erfðarannsóknastofu Matís ohf. 

Undir hættumörkum

Eldislaxarnir þrír veiddust í Laugardalsá í Ísafjarðardjúpi, Selá í Skjaldfannardal í Ísafjarðarsjúpi og Staðará í Steingrímsfirði. Samkvæmt Hafrannsóknastofnun er fjöldi eldislaxa í ám á þessum svæðum í samræmi við það sem áhættumat stofnunarinnar um erfðablöndun gerir ráð fyrir miðað við núverandi umfang sjókvíaeldis hér við land. Hlutfall eldislaxa í ánum, miðað við þennan fjölda laxa, sé vel undir þeim mörkum að erfðasamsetning villtu stofnanna sé hætta búin.
 

 

hallao's picture
Halla Ólafsdóttir
dagskrárgerðarmaður