Athugið þessi frétt er meira en 3 ára gömul.

Telur viðræður vera lokatilraun í björgun WOW

22.03.2019 - 08:24
Mynd með færslu
 Mynd:
Stefnt er að því að niðurstöður viðræðna um kaup Icelandair Group á WOW liggi fyrir á mánudaginn. Tilkynnt var í gær að viðræður um kaup bandaríska fjárfestingafélagsins Indigo Partners á WOW hefðu runnið út í sandinn.

Steinn Logi Björnsson, fyrrverandi framkvæmdastjóri hjá Icelandair og núverandi eigandi flugfélagsins Bláfugls, segir að viðræðurnar séu lokatilraun til að bjarga WOW. Hann telur að ástæðan fyrir þeim stutta tíma sem gefinn er í viðræðunum kunni að vera sú að gjalddagi sé á 150 milljóna króna vaxtagreiðslu á láni WOW á mánudag. Aðstæður séu allt aðrar nú en þegar viðræður um kaup Icelandair á WOW air runnu út í sandinn fyrir jól.

„Pakkinn hefur bara versnað en staða Icelandair hefur líka breyst út af Maximum, vélunum sem hafa verið kyrrsettar. Núna er Icelandair með þrjár slíkar vélar og tekur við sex vélum á næstu mánuðum. Það gæti því verið að þá vantaði níu velar. Ef allt fer á versta veg. Auðvitað er hvatinn því allt annar núna og meiri að skoða þetta upp á nýtt,“ sagði Steinn Logi í Morgunútvarpinu á Rás 2.

Steinn Logi segir að það verði hættulegt fyrir Icelandair að kaupa kennitölu WOW. „Það er svona óþekkt skuldastærð, samkomulagið við skuldabréfaeigendur hefur raknað upp. Ef Icelandair kemur að þessu undir sömu kennitölu veit maður ekki hvort leigusalar og eitthvað málamyndasamkomulag sem er búið að ná við þá myndi rakna upp líka. Þannig að ég held að það sé hættulegasta leiðin og ég held að Icelandair ætti að forðast það í lengstu lög að þurfa að taka yfir kennitöluna,“ sagði Steinn Logi. Hann telur að það væri best fyrir Icelandair Group að komast yfir Airbus vélarnar sem Wow air  hefur á leigu, flugrekstrarleyfi fyrir þær og vörumerkið WOW air.

Í tilkynningu frá Icelandair í gær kemur fram að viðræðurnar fari fram í samráði við stjórnvöld. Steinn Logi telur að aðkoma stjórnvalda að málinu geti ekki falið í sér beina peningaðstoð. „Það stenst ekki samkeppnislög Evrópusambandsins og ég hugsa að menn myndu ekki láta það yfir sig ganga þar,“ sagði Steinn Logi.