Telja Reykhólahrepp hafa rofið samstöðuna

20.12.2018 - 17:20
Mynd með færslu
 Mynd: RÚV Grafík - RÚV
Bæjarstjórn Vesturbyggðar og sveitarstjórn Tálknafjarðarhrepps vilja fá íbúa Reykhólahrepps í lið með sér við að tryggja að vegur um Teigsskóg verði fyrir valinu við uppbyggingu vega um sunnanverða Vestfirði. Þau áform sveitarstjórnar Reykhólahrepps að velja aðra leið hafi rofið þá samstöðu sem ríkt hafi á meðal Vestfirðinga.

Vesturbyggð og Tálknafjarðarhreppur samþykktu á fundi í morgun ályktun um Vestfjarðaveg þar sem þeir biðla til íbúa Reykhólahrepps að leggjast á árar með íbúum sveitarfélaganna við að ljúka endurnýjun Vestfjarðavegar sem stofnbrautar, sem allra fyrst, svo leysa megi samgönguvandamál Vestfjarða.

Hingað til hafi ríkt alger sátt og einhugur 

Í ályktuninni segir að samgöngur Vestfirðinga hafi lengi valdið íbúum og fyrirtækjum erfiðleikum og mikil vinna verið lögð í endurbætur á Vestfjarðavegi. Til að stytta ferðatíma og auðvelda samgöngur árið um kring, hafi hingað til ríkt alger sátt og einhugur meðal allra sveitarstjórna á Vestfjörðum um að leggja áherslu á láglendisveg út úr fjórðungnum samkvæmt leið Þ-H um Teigsskóg. „Nú eru blikur á lofti þegar við heyrum að rof hefur orðið í þessari samstöðu okkar Vestfirðinga þegar sveitarstjórn Reykhólahrepps virðist ætla að fara aðrar leiðir en áður hefur verið sátt um,“ segir orðrétt.

Biðla til íbúa Reykhólahrepps

Þá er fyrir hönd íbúa í Vesturbyggð og Tálknafirði óskað eftir nánu samstarfi við íbúa Reykhólahrepps um að koma samgöngumálum Vestfirðinga í viðunandi horf sem allra fyrst. Íbúar fjórðungsins séu of fáir til að standa ekki saman í sínum framfaramálum, en brýnt sé að allir standi saman að hagsmunamálum fjórðungsins.

Taka þurfi tillit til sameiginlegra hagsmuna 

„Framundan er stór ákvörðun sem sveitarstjórn Reykhólahrepps þarf að taka og við óskum eftir því að tekið verði tillit til hagsmuna okkar íbúa og fyrirtækja á Vestfjörðum við þá ákvörðun. Það skiptir alla Vestfirðinga gríðarlegu máli að fá samgöngubætur á Vestfjarðavegi í gegn sem allra fyrst og íbúar Reykhólahrepps hafa lykilinn að þeim samgöngubótum í sínum höndum. Við óskum jafnframt eftir stuðningi stjórnvalda til að koma þessum brýnu samgöngubótum, samkvæmt Þ-H leið á Vestfjarðavegi, í gegn sem allra fyrst,“ segir í sameiginlegri ályktun bæjarstjórnar Vesturbyggðar og sveitarstjórnar Tálknafjarðarhrepps.

agusto's picture
Ágúst Ólafsson
Fréttastofa RÚV
Síðast:
Þessi þáttur er í hlaðvarpi