Sögurnar eiga það sammerkt að fjalla um kynslóð höfundar og öll þau verkefni og vandamál sem ungt fólk á við að etja, þar á meðal samskipti. Fríða segir að sú kynslóð sem nú sé að alast upp eigi til dæmis erfitt að mynda augnsamband við annað fólk. „Ég upplifi það alla vega þannig að maður treystir minna á sína eigin reynslu. Ég er beinlínis búin að vera fyrir framan skjá síðan ég var í fimmta bekk. Að tala við fólk á MSN og Myspace og síðar inni á Facebook og auðvitað hefur þetta áhrif á samskipti fólks. Við kunnum ekki jafn vel að treysta á tilfinningu og læra núansana sem fylgja mannlegu samtali og þaðan kemur kvíðinn. Þaðan kemur þessi samfélagsmiðlakvíði.“

Fríðu finnst ákaflega áhugavert að skoða þessi samskipti ungs fólks í dag og hún vill meina að þessi kynslóð eigi erfitt með að taka á móti viðurkenningu í formi bross eða í blæbrigðum í röddu. Það eina sem virkar er lækið og viðurkenningin á samfélagsmiðlum. „Svo er það þetta kynslóðabil sem er að verða til. Ég held að það séu svolítið skörp skil að myndast. Þetta eru svona flekar sem eru að færast í sundur, einfaldlega vegna tækninnar,“ segir höfundurinn Fríða Ísberg.