Suu Kyi fordæmir mannréttindabrot í Rakhine

19.09.2017 - 05:15
Erlent · Asía · Mjanmar
epa06213002 Myanmar's State Counselor Aung San Suu Kyi gives a speech on the Myanmar government's efforts with regard to national reconciliation and peace in Naypyitaw, Myanmar, 19 September 2017. Suu Kyi used to speech to address national
 Mynd: EPA-EFE - EPA
Aung San Suu Kyi, forseti Mjanmars, segist finna til með öllum þeim sem þjást vegna átakanna í Rakhine héraði landsins. Hún segir stjórnvöld áhyggjufull yfir þeim fjölda múslima sem hafa flúið átakasvæði yfir til Bangladess. 

Suu Kyi ávarpaði þjóð sína í sjónvarpi í nótt. Viðbrögðum hennar við ástandinu í Rakhine hefur lengi verið beðið. Þrengt er að Róhingja-múslimum í héraðinu, þeir stráfelldir og þorp þeirra brennd. Róhingjar njóta ekki almennra réttinda í Mjanmar. Suu Kyi segist finna til með fórnarlömbum átakanna og fordæmir þau mannréttindabrot sem kunna að hafa verið framin í átökunum.

Hún segir stjórnvöld vera reiðubúin til þess að staðfesta réttarstöðu þeirra 410 þúsund Róhingja sem flúið hafa yfir landamærin undanfarinn mánuð. Verður það gert til að auðvelda þeim að snúa aftur heim.  Suu Kyi segir Mjanmar ekki mega tvístrast vegna trúarskoðana þjóðarinnar. Meirihluti þjóðarinnar er búddatrúar en Róhingjar eru múslimar eins og áður segir. Margir neita að kalla Róhingja annað en Bengala og neita að viðurkenna þá sem Mjanmara þar sem menningarsaga þeirra eigi ekkert skylt við ríkið. Suu Kyi segir í ávarpinu að stjórnvöld séu reiðubúin að fá alþjóðlega eftirlitsmenn til landsins hvenær sem er til þess að fylgjast með ástandinu í Rakhine.

Þeir sem hafa flúið Rakhine hafa sagt sögur af manndrápi, nauðgunum, pyntingum og íkveikjum af hálfu öryggissveita Mjanmars. Suu Kyi segir sveitirnar eiga að fylgja ströngum kröfum og gerð verði rannsókn á hvort mannréttindi hafi verið brotin í Rakhine.

Róbert Jóhannsson
Fréttastofa RÚV
Síðast:
Þessi þáttur er í hlaðvarpi