Athugið þessi frétt er meira en 3 ára gömul.

Styrkja verslanir í strjálbýli um 10 milljónir

13.12.2018 - 15:02
Mynd með færslu
 Mynd:
Samgöngu- og sveitarstjórnarráðherra hefur samþykkt tillögur valnefndar um styrki sem veittir eru á grundvelli stefnumótandi byggðaáætlunar fyrir árin 2018-2024. Alls bárust valnefndinni 20 umsóknir um styrki. Að þessu sinni var tíu milljónum króna úthlutað til að efla verslun í strjálbýli fyrir árið 2018. Fyrirheit voru gefin um styrki fyrir 25,7 milljónir króna fyrir tímabilið 2018-2021. Samningar vegna styrkjanna verða undirritaðir á næstu dögum.

Á vef Stjórnarráðsins segir að markmið með framlögunum sé að styðja verslun í skilgreindu strjálbýli fjarri stórum þjónustukjörnum þar sem verslun hefur átt erfitt uppdráttar. „Framlögin koma m.a. til með að bæta rekstur verslana og skjóta frekari stoðum undir hann, m.a. með samspili við aðra þjónustu, breyttri uppsetningu í verslunum og bættri aðkomu.“

Verkefnin sem hljóta styrki eru:

  • Búðin Borgarfirði. Gusa ehf. hlýtur styrk að upphæð 1.000.000 kr. fyrir árið 2018.
  • Verslun í Norðurfirði í Árneshreppi. Árneshreppur fær styrk að upphæð 7.200.000 kr. til þriggja ára eða kr. 2.400.000 kr. á ári 2019-2021.
  • Verslun í Hrísey. Hríseyjarbúðin ehf. fær styrk að upphæð 6.300.000 kr. sem dreifist þannig: 300.000 kr. árið 2018, en 2.000.000 kr. árlega 2019-2021.
  • Strandakjarni í Hólmavík. Kaupfélag Steingrímsfjarðar hlýtur styrk að upphæð 3.300.000 kr. fyrir árið 2018.
  • Raufarhöfn til frambúðar. Verslunin Urð ehf. fær styrk að upphæð 5.500.000 kr. sem dreifist þannig: 3.000.000 kr. fyrir árið 2018 og 2.500.000 kr. árið 2019.
  • Verslunarrekstur í Grímsey. Kríuveitingar hljóta styrk að upphæð 2.400.000 kr. fyrir árið 2018.
solveigk's picture
Sólveig Klara Ragnarsdóttir
Fréttastofa RÚV