Athugið þessi frétt er meira en 3 ára gömul.

Stofna nefnd um endurbætur á tjáningarfrelsi

02.02.2018 - 12:39
Mynd með færslu
 Mynd: RÚV
Ríkisstjórnin samþykkti á fundi sínum í morgun að skipa sjö manna nefnd sem vinna á að endurbótum á löggjöf á sviði tjáningar,- fjölmiðla- og upplýsingafrelsis. Í nefndinni verða fulltrúar þeirra ráðuneyta sem fara með framkvæmd löggjafar á þessu sviði auk annarra sérfræðinga í málaflokknum.

Meðal verkefna nefndarinnar verður að fara yfir þau frumvörp sem unnin voru á vegum stýrihóps mennta- og menningarmálaráðherra, sem skipaður var í kjölfar þingsályktunar um að Ísland skapi sér afgerandi lagalega sérstöðu varðandi vernd tjáningar- og upplýsingafrelsis. Þau frumvörp lutu að ærumeiðingum, afnámi svokallaðrar gagnageymdar á grundvelli fjarskiptalaga, ábyrgð hýsingaraðila, í samræmi við lög um rafræn viðskipti, og hatursáróðri.

Skoða tjáningarfrelsi opinberra starfsmanna

Nefndinni er einnig ætlað að taka til skoðunar fyrirliggjandi tillögur er lúta að tjáningarfrelsi opinberra starfsmanna og eftir atvikum skyldu þeirra til að greina frá lögbrotum eða brotum á siðareglum sem þeir verða áskynja um í starfi.

Kanna hvort fullgilding samnings kalli á lagabreytingar

Þá er nefndinni falið að fara yfir gildandi upplýsingalög í ljósi þróunar á alþjóðavettvangi og framkvæmdar laganna og meta hvort þörf sé á lagabreytingum. Í því sambandi verði kannað hvort fullgilding samnings Evrópuráðsins um aðgang að opinberum gögnum kalli á lagabreytingar hér á landi. Þá verði lagt mat á erindi sem forsætisráðuneytinu hafa borist á undanförnum árum varðandi endurskoðun laganna og önnur atriði sem sérstaklega hefur reynt á í framkvæmd. Í tilkynningu frá forsætisráðuneyti segir að þar megi nefna undanþágur vegna gagna er lúta að lögfræðiráðgjöf varðandi málshöfðun gegn opinberum aðilum, gögn er varða útboð eða val á viðsemjendum í ljósi samkeppnisréttar og fyrirkomulag varðandi undanþágur frá gildissviði laganna. Nefndinni er einnig falið að meta hverjar aðrar lagabreytingar kunni að vera æskilegar á sviði tjáningar-, fjölmiðla- og upplýsingafrelsis.

Nefndinni er ætlað að skila tillögum um fyrri tvö atriðin 1. október næstkomandi og við síðari tvö 1. mars á næsta ári.

dagnyhe's picture
Dagný Hulda Erlendsdóttir