Athugið þessi frétt er meira en 2 ára gömul.

Stefna að loftslagsvænni landbúnaði

Mynd með færslu
 Mynd: Rúnar Snær Reynisson - RÚV
Guðmundur Ingi Guðbrandsson, umhverfis- og auðlindaráðherra, og Kristján Þór Júlíusson, sjávarútvegs- og landbúnaðarráðherra, hafa kynnt í ríkisstjórn ramma um samstarfsverkefni við sauðfjárbændur um loftslagsvænni landbúnað. Í stjórnarsáttmála ríkisstjórnarinnar er sérstaklega kveðið á um samstarfsverkefni stjórnvalda og sauðfjárbænda um aðgerðir í loftslagsmálum.

Samþykkt var að verkefnið yrði þróað á árinu og framkvæmd þess falin Ráðgjafarmiðstöð landbúnaðarins í samstarfi við Landgræðsluna, Skógræktina og sauðfjárbændur, að því er fram kemur í frétt á vef stjórnarráðsins.

Þar segir að þróuð verði heildstæð ráðgjöf og fræðsla fyrir bændur um hvernig þeir geti dregið úr losun og aukið bindingu á búum sínum. Gert sé ráð fyrir að bændur vinni áætlanir fyrir bú sín þar sem tilteknar eru aðgerðir sem meðal annars geti falist í samdrætti í losun frá búrekstri og landi og/eða bindingu kolefnis.

„Þátttaka í verkefninu verður til að byrja með bundin við sauðfjárbændur sem taka þátt í gæðastýrðri sauðfjárrækt og gengið er út frá því að allir þátttakendur í verkefninu tryggi að losun frá landi þeirra aukist ekki. Verkefnið er vistað í umhverfis- og auðlindaráðuneytinu og stefnt er að fullri innleiðingu þess árið 2020,“ segir í fréttinni.

johann's picture
Jóhann Bjarni Kolbeinsson
Fréttastofa RÚV