Mynd: EPA
Athugið þessi frétt er meira en 2 ára gömul.
Starfsmenn WHO flýja átök í Austur-Kongó
16 starfsmönnum Alþjóðaheilbrigðisstofnunarinnar, WHO, var tímabundið forðað úr borginni Beni í austurhluta Austur-Kongó eftir að sprengja lenti á híbýlum þeirra. Liðsmenn sameinaða lýðveldishersins, ADF, og friðargæslusveitar Sameinuðu þjóðanna kljást á svæðinu, og segir Michel Yao, stjórnandi WHO á svæðinu, að hann viti ekki hverjir vörpuðu sprengjunni.
Enginn starfsmanna WHO slasaðist. Þeir urðu skelfingu lostnir, og voru fluttir í borgina Goma þar sem þeir fá að jafna sig, hefur AFP fréttastofan eftir Yao.
Alls er 191 starfsmaður stofnunarinnar í Beni, þar sem þeir takast á við útbreiðslu ebóla-veirunnar. Alls hafa 213 látið lífið á svæðinu vegna ebóla síðan í ágústbyrjun. Heilbrigðisráðuneytið í Austur-Kongó greindi frá því fyrr í dag að hlé væri gert á baráttunni við ebóla á meðan átökum ADF og friðargæslusveitarinnar standa, þar sem þau eru skammt frá bráðadeild sjúkrahúss á svæðinu og nærri híbýlum starfsmanna WHO. Sameinuðu þjóðirnar segja átökin hindra heilbrigðisstarfsfólk við að halda aftur af ebólafaraldrinum, en áratugum saman hafa þjóðflokkar á svæðinu staðið í skærum sín á milli.
