Starfsmaður Isavia sagður hafa þegið milljónir í mútur

21.11.2019 - 15:49
Mynd með færslu
 Mynd: Anton Brink - Ruv.is
Héraðssaksóknari hefur ákært fyrrverandi þjónustustjóra hjá Isavía fyrir mútuþægni og umboðssvik. Hann er sagður hafa þegið um 3,5 milljónir í mútur í tengslum við kaup Isavia á miðum í bílastæðahlið fyrir nokkrum árum. Framkvæmdastjóri tæknifyrirtækis sem seldi Isavia miðana er einnig ákærður. Hann er sagður hafa hagnast um 4,5 milljónir á viðskiptunum. Isavia krefst tólf milljóna í skaðabætur vegna málsins.

Ákæran verður þingfest í Héraðsdómi Reykjaness í byrjun næsta mánaðar.  Í henni kemur fram að málið megi rekja til kæru Isavia  í júlí fyrir tveimur árum en Isavia hafði þá borist upplýsingar um brotin frá fyrrverandi starfsmanni tæknifyrirtækisins. 

Héraðssaksóknari segir í greinargerð með ákærunni að uppljóstrarinn hafi átt ýmsum samskiptum við þjónustustjórann hjá Isavia um miðakaupin og haft vitneskju um brotin. Það sem fram hafi komið við rannsókn málsins hafi hins vegar ekki þótt leiða til þess að hann yrði ákærður.

Í ákæru héraðssaksóknara kemur meðal annars fram Isavia hafi ákveðið að hætta viðskiptum við norskt félag um kaup á bílastæðamiðum og beint í staðinn viðskiptum sínum til hins íslenska íslenska tæknifyrirtækis. Það hafi gerst að frumkvæði þjónustustjórans sem hafði umsjón með bílastæðum Isavia við Keflavíkurflugvöll.  Þess er sérstaklega getið að verð íslenska fyrirtækisins hafi verið miklu hærra en Isavia greiddi norska fyrirtækinu. 

Saksóknari segir að þegar Isavia keypti 760 þúsund aðgangsmiða í júní 2015 hafi þjónustustjórinn í krafti stöðu sinnar séð til þess að Isavia borgaði óeðlilega hátt verð.  Hann og framkvæmdastjórinn höfðu þá gert með sér samkomulag um að skipta ávinningnum sín á milli og var sami háttur hafður  á tæpu ári seinna þegar aftur voru keyptir 760 þúsund aðgangsmiða. 

Í ákærunni segir að greiðslur tæknifyrirtækisins til fyrirtækis þjónustufulltrúans hafi verið skráðar sem ráðgjöf en héraðssaksóknari telur að þær hafi ekki byggst á neinum raunverulegum viðskiptum heldur einungis verið yfirvarp fyrir mútugreiðslur. Meðal gagna málsins er afrit af Excel-skjali sem fannst við leit í tölvukerfi tæknifyrirtækisins. Það skjal segir saksóknari sýna svo ekki verði um villst ráðagerð um samráð mannanna tveggja. 

freyrgigja's picture
Freyr Gígja Gunnarsson
Fréttastofa RÚV
Síðast:
Þessi þáttur er í hlaðvarpi