Athugið þessi frétt er meira en mánaðargömul.

Stafræn ökuskírteini tilbúin í símann í vor

30.01.2020 - 07:07
Iphone snjallsími
 Mynd: Pixabay
Stefnt er að því að byrja að gefa út stafræn ökuskírteini í vor og því hægt að hafa skírteinið í símanum. Áslaug Arna Sigurbjörnsdóttir, dómsmálaráðherra, reiknar með að nýja fyrirkomulagið verði til hagsbóta fyrir fólk þar sem síminn er oftast með í för og nú þegar hægt að nota hann sem greiðslukort, flugmiða og ýmislegt fleira.

Í tilkynningu á vef Stjórnarráðsins kemur fram að Stafrænt Ísland hafi á síðustu mánuðum unnið að útgáfu stafrænna ökuskírteina í samvinnu við Ríkislögreglustjóra til notkunar í snjallsíma innan Íslands. Mikil þróun hefur verið á undanförnum árum í notkun öruggri snjallsímaþjónustu sem gerir það kleift að gefa ökuskírteini út með öðrum hætti en á plastkortum.

Ökuskírteinagrunnur og afgreiðslukerfi ökuskírteina er þar sagt komið til ára sinna og kallaði á stafræna lausn til þæginda fyrir almenning. Nú sé tæknileg útfærsla tilbúin og ekkert því til fyrirstöðu að hefja útgáfu á stafrænum ökuskírteinum fyrir snjallsíma, jafnt fyrir Android og iOS stýrikerfi.

Notendur mun geta fengið stafrænu ökuskírteinin með því að sækja um þau á Ísland.is, sem tryggir að örugga afhendingu þeirra með rafrænum skilríkjum. 

Stefnt er að því að koma stafrænum ökuskírteinum í gagnið fyrir 1. júní 2020.