„Snertir okkur öll þegar börn eiga í hlut“

27.12.2018 - 18:38
Mynd með færslu
 Mynd:
Auðbjörg Brynja Bjarnadóttir, hjúkrunarfræðingur á heilsugæslustöðinni á Kirkjubæjarklaustri, var fyrst á vettvang slyssins við Núpsvötn ásamt lögreglumanni frá Kirkjubæjarklaustri. „Það var nokkuð ljóst þegar við komum þarna að að um stórslys var að ræða og að þetta var mjög alvarlegt slys, það var sýnilegt á bílnum og á fólkinu sem var komið út. Í raun og veru lýsir það þessu best að þetta var hræðileg aðkoma og mjög krefjandi aðstæður.“

Þrír létust í slysinu, tveir fullorðnir og eitt barn, og fjórir voru fluttir alvarlega slasaðir á slysadeild Landspítalans í Fossvogi með þyrlu Landhelgisgæslunnar, þar af tvö börn á aldrinum 7 til 9 ára. Í bílnum voru tvær fjölskyldur en fólkið var allt breskir ríkisborgarar af indverskum uppruna og hafa sendiráð Indlands og Bretlands á Íslandi veitt aðstoð vegna slyssins. 

Auðbjörg Brynja segir í samtali við fréttastofu að það fyrsta sem þau gerðu þegar komið var á vettvang slyssins hafi verið að koma upplýsingum áleiðis um fjölda slasaða og áverka. „Og síðan var maður að átta sig á því hverjum maður myndi ná út og hlúa að þeim sem voru mikið slasaðir. Það var líka afskaplega kalt þarna á svæðinu og okkur vantaði hendur til að byrja með en síðan komu fleiri á vettvang og allir unnu sem ein vél. Því miður höfum við komið of oft saman í svona slysum en allir unnu vel saman.“ 

Herdís Gunnarsdóttir, forstjóri heilbrigðisstofnunar Suðurlands, sagði í svari til fréttastofu að viðbragðsaðilar hafi staðið sig  eins og hetjur með „fumlausum og faglegum viðbrögðum við afar erfiðar aðstæður.“ Það hafi verið erfiður tími hjá þeim í upphafi þegar þau voru enn fáliðuð á vettvangi. „Engu að síður hafði það ekki úrslitaáhrif á lífsbjörg hinna slösuðu þó þau væru fá á slysstað í upphafi,“ segir Herdís.

Eiginmaður Auðbjargar var aðhlynningarstjóri á vettvangi og þau voru einnig fyrst á vettvang þegar alvarlegt rútuslys varð í Eldhrauni fyrir nákvæmlega ári þar sem einn kínverskur ferðamaður lést og annar skömmu síðar á sjúkrahúsi. 

Fram kom í greinargerð Herdísar sem hún sendi fjölmiðlum að slysið hefði tekið mjög á þá sem þarna voru á vettvangi. „Það er ákaflega erfitt þegar verkefnið er mikið stærra en maður ræður við og það verður að segjast eins og er að þegar börn eiga í hlut þá snertir það okkur öll verulega mikið.“ Viðrunarfundur verður haldin fyrir viðbragðsaðila á Kirkjubæjarklaustri í kvöld og segir Auðbjörg það alltaf gert eftir svona viðburði. „Við hittumst og viðrum málin eftir svona og að sjálfsögðu býðst okkur handleiðsla ef einhverjir vilja eða þurfa.“

 

freyrgigja's picture
Freyr Gígja Gunnarsson
Fréttastofa RÚV
Síðast:
Þessi þáttur er í hlaðvarpi