Sjávartengt háskólanám í Eyjum

15.03.2016 - 14:05
Mynd með færslu
 Mynd: Háskólinn í Reykjavík
Háskólinn í Reykjavík ýtir úr vör í haust háskólanámi í haftengdri nýsköpun í Vestmannaeyjum. Skólinn hefur þegar opnað fyrir umsóknir. Við erum mjög ánægð með að geta boðið upp á þetta nám“, segir Ari Kristinn Jónsson, rektor H.R. Námið er skipulagt í samstarfi við Háskólann á Akureyri og sjávarútvegsfyrirtæki í Eyjum.

„Sjávarútvegur er einn af undirstöðuatvinnuvegum þjóðarinnar og það skiptir mjög miklu máli að við náum að hámarka þau verðmæti sem sjávarútvegurinn skapar. Leiðin til þess er að efla nýsköpun og menntun á sviði sjávarútvegs“, segir Ari Kristinn. Námið er þrjár annir og veitir diplómagráðu í haftengdri nýsköpun en útskrifaðir nemendur munu einnig geta nýtt einingar í áframhaldandi nám við Háskólann í Reykjavík og Háskólann á Akureyri.

Fjölbreytt nám

Á námsbrautinni verða kennd nýsköpun og stofnun fyrirtækja, markaðsfræði, rekstrarstjórnun, alþjóðaviðskipti, upplýsingatækni og veiðitækni. Kennarar eru frá viðskiptadeild HR, auðlindadeild HA og fyrirtækjum í sjávarútvegi. Nemendur munu vinna styttri og lengri verkefni, meðal annars í vinnslutækni, skráningu, ferlum og markaðsmálum. „Nemendur kynnast þannig virðiskeðjunni sem hefst við veiðar og lýkur á borði neytenda út um allan heim“, segir rektor. 

 

Samúel Örn Erlingsson
Fréttastofa RÚV
Síðast:
Þessi þáttur er í hlaðvarpi