Sigrún friðar hafnargarðinn við Tollhúsið

Mynd með færslu
 Mynd: rúv

Sigrún friðar hafnargarðinn við Tollhúsið

22.10.2015 - 18:01

Höfundar

Sigrún Magnúsdóttir, settur forsætisráðherra, hefur ákveðið að friða hafnargarðinn við Tollhúsið í samræmi við tillögu Minjastofnunar Íslands. Sigmundur Davíð Gunnlaugsson, forsætisráðherra, vék frá málinu en Reykjavíkurborg taldi hann vanhæfan til að taka þessa ákvörðun.

Fram kemur í tilkynningu frá forsætisráðuneytinu  að það muni á næstunni kalla saman hagsmunaaðila málsins til að kanna „hvort ásættanleg lausn finnst í málinu, sem tryggir vernd þessara merku menningarminja en stuðlar jafnframt að því að byggingaráform á lóðinni nái fram að ganga í einhverri mynd.“

Borgarlögmaður sendi forsætisráðuneytinu bréf um miðjan þennan mánuð. Þar kom fram að borgaryfirvöld drægju það í efa að Sigmundur Davíð væri hæfur til að taka afstöðu til erindisins.

Borgarlögmaður benti meðal annars á að Sigmundur Davíð hefði tjáð skoðun sína á afgerandi hátt og komið að málinu á fyrri stigum. Var þar meðal annars vísað til breytingar á afstöðu Minjastofnunar eftir að forstöðumaður hennar fór á fund í ráðuneytinu og til skrifa Sigmundar Davíðs á vefsvæði hans.

Kjarninn greindi frá því um helgina að lóðarhafar við hlið Tollhússins teldu að friðun hans muni að lágmarki valda þeim tjóni upp á 2,2 milljarða. Þeir muni sækja það tjón til Minjastofnunar.