Athugið þessi frétt er meira en 3 ára gömul.

Sex vænar þáttaraðir væntanlegar með vorinu

Mynd með færslu
 Mynd: Skjáskot/Stiklur - Youtube

Sex vænar þáttaraðir væntanlegar með vorinu

02.05.2018 - 16:04

Höfundar

Íslenska vorið getur verið skrýtið dýr. Á meðan grillið og vorlaukana fennir í kaf er ágætis huggun harmi gegn að hella upp á og koma sér vel fyrir, hvort sem maður er einn eða í góðum félagsskap, og hámhorfa á eina þáttaröð. Hér koma sex hugmyndir að þáttaröðum sem væntanlegar eru með vorinu.

Andstæðingar Íslands

Þrír þættir
Frumsýnt á RÚV 11. maí

Synir Eiðs Smára munu leika fyrir Real Madrid næsta vetur. - Mynd: Andstæðingar Íslands / RÚV

Landsliðskempan Eiður Smári Guðjohnsen kynnir sér andstæðinga Íslands á HM í Rússlandi í fróðlegum og skemmilegum þáttum. Hann sækir löndin heim, kynnist fótboltamenningunni, hörðustu stuðningsmönnunum, gömlum hetjum, krökkunum sem eiga eftir að skipa landslið framtíðarinnar og síðast en ekki síst fólkinu í landinu. Þá mun hann kanna sérstaklega hvað þessar þjóðir vita í raun og veru um þennan nýja andstæðing á HM sem kemur svona langt að úr norðrinu.

Safe

Átta þættir
Frumsýnt á Netflix 10. maí

Franski sjónvarpsrisinn Canal+ og Netflix leiða hesta sína saman í dramatískum glæpaþáttum. Michael C. Hall fer með hlutverk læknisins Tom, en Hall er þekktastur fyrir hlutverk í Dexter þáttunum og Six feet under. Tom er ekkill og býr ásamt unglingsdætrum sínum tveimur í afgirtu yfirstéttarhverfi í Bandaríkjunum. Þegar eldri dóttir hans hverfur fer hann smám saman að komast á snoðir um leyndarmál allra þeirra sem standa honum næst.

Patrick Melrose

Fimm þættir
Frumsýnt á Showtime 12. maí

Stórleikarinn Benedict Cumberbatch fer á kostum sem Patrick Melrose, en þessir kolsvörtu gaman-dramaþættir eru byggðir á fimm bóka seríu eftir rithöfundinn Edward St Aubyn. Sagan er að miklu leyti sannsöguleg og byggð á lífi St Aubyns sjálfs, en hann ólst upp í brotinni yfirstéttarfjölskyldu og leið hrottalegt ofbeldi af hálfu föður síns i æsku. Hann ánetjaðist áfengi og fíkniefnum og reifar sagan baráttu hans við fíknina og glímuna við fortíðina auk þess sem hann reynir að standa við skuldbindingar sínar sem fjölskyldufaðir. Þættirnir eru prýddir stórstjörnum á borð við Jennifer Jason Leigh, Allison Williams og Hugo Weaving.

The Rain

Átta þættir
Frumsýnt á Netflix 4. maí

Netflix heldur áfram að færa sig út fyrir bandarískar framleiðslur og eftir gríðarlega velgengni þýsku vísindaskáldsöguþáttanna Dark eru það dönsku spennuþættirnir The Rain sem ríða á vaðið. Stikla þáttanna gefur til kynna mjög drungalegt heimsendadrama en í upphafi sögu hefur banvænn vírus þurrkað út mestan part lífs á jörðinni. Við fyrstu sýn virðist hér vera á ferð einskonar skandinavísk, drungalegri og raunsæislegri útgáfa af hinum geysivinsælu The Walking Dead þar sem ættbálkapólitík og persónulegar litlar sögur eru í fókus í dystópískum heimi sem er algjörlega hruninn.

Njósnir í Berlín/Berlin Station

Tíu þættir
Sýningar hefjast á RÚV 14. maí

Spennuþáttaröð um CIA-starfsmanninn Daniel Miller sem er sendur í útibú leyniþjónustunnar í Berlín sem njósnari. Hann fær það hlutverk að komast að því hver hefur lekið upplýsingum um störf leyniþjónustunnar til þekkts uppljóstrara. Með aðalhlutverk fara Richard Armitage, Michelle Forbes, Rhys Ifans og Richard Jenkins.

SKAM Austin

Tíu þættir
Sýningar hófust 24. apríl á Facebook Watch

Það er mörgum fagnaðarefni að SKAM heimurinn sé snúinn aftur í bandarískri endurgerð norsku SKAM þáttanna eftir Julie Andem, sem notið hafa gríðarlegra vinsælda hér á landi og um heim allan.

Þættirnir gerast í Austin, Texas og er formið á þáttunum að flestu leyti eins og á hinum norsku. Stutt klippa er sett inn á samfélagsmiðla daglega auk þess sem hægt er að fylgjast með sögupersónum á samfélagsmiðlum, á Instagram og víðar. Líkt og í upprunalegu útgáfunni eru það ungir ófaglærðir leikarar sem fara með hlutverk aðalpersónanna, en í SKAM Austin eiga allar sögupersónur sér samsvörun úr norsku þáttunum.

Tengdar fréttir

Sjónvarp

Fimm fræknir ofurhetjuþættir

Kvikmyndir

Fimm sjóðheitar sumarmyndir

Sjónvarp

Tíu bestu sjónvarpsþættir ársins 2017

Sjónvarp

Sex nýir sjónvarpsþættir fyrir sumarglápið