Guðlaugur Kristófersson, starfsmaður Nesfisks, var brugðið þegar sérsveit mætti á svæðið í dag. Mynd: Ægir Þór Eysteinsson - RÚV
Athugið þessi frétt er meira en 5 ára gömul.
Sérsveitin kölluð út vegna fuglafælu
Skothvellir sem heyrðust nærri Garði í morgun reyndust vera frá gasbyssum sem notaðar eru til að bægja vargi frá fiskhjöllum Nesfisks. Sérsveit lögreglu var kölluð út þegar tilkynning barst um skothvelli. Samkvæmt fyrstu upplýsingum sem fréttastofa aflaði af svæðinu var grunur um að vopnaður maður væri á ferð við hjallana sem eru nærri golfskálanum í Leiru. Svo reyndist ekki vera og er aðgerðum lokið.
„Það er nákvæmlega þannig,“ segir Guðlaugur Kristófersson hjá Nesfiski aðspurður hvort aðgerðir sérsveitar í morgun tengdust fiskþurrkun á hjöllum fyrirtækisins.
„Við erum með gasbyssu og búnir að vera með til margra ára. Ég setti hana í gang í gær vegna ágangs fugls. Það varð til þess að sérsveitin var kölluð út.“
Guðlaugur segir það því hafa komið verulega á óvart þegar sérsveitin mætti á svæðið. „Þetta hefur ekki komið upp áður. Þetta kom verulega á óvart. Ætli við munum ekki koma til með að skoða verklagið út frá þessu,“ segir Guðlaugur.
Uppfært 11.36: samkvæmt tilkynningu frá lögreglu voru það lögreglumenn sem voru að störfum á svæðinu sem kölluð sérsveitina út þegar þeir heyrðu byssuhvelli.
Mynd úr safni. Mynd: RÚV
Sérsveitin. Lögreglumenn á Suðurnesjum óskuðu aðstoðar sérsveitar þegar þeir heyrðu hvelli frá fuglafælunni.
Í tilkynningu lögreglu segir að lögreglumenn hafi verið að störfum á Garðvegi, skammt frá Garði, vegna mannlausrar bifreiðar sem var illa staðsett í vegarkanti. Þegar lögreglumennirnir urðu varir við skothvelli sem virtust koma frá fiskihjöllum skammt frá.
Í tilkynningunni segir að sérsveit ríkislögreglustjóra hafi verið stödd á æfingasvæði lögreglunnar á Keflavíkurflugvelli og var óskað eftir aðkomu hennar. Í ljós hafi komið að um var að ræða „hvellbyssur, sem settar höfðu verið upp við fiskihjallana, í því skyni að fæla burtu vargfugl.“
Lokanir lögreglu á Garðvegi stóðu yfir í um eina klukkustund.
